Балаҕан ыйын 6-8 күннэригэр, бары билэрбит курдук, Испания Понтеведра куоратыгар 21 саастаах эдэр уолаттар ортолоругар көҥүл тустууга Аан дойду чөмпүйэнээтэ буолан ааста. Бу күрэххэ икки саха чулуу уола Арассыыйа хамаандатын састаабыгар киирэн, кыттыыны ылла. Ол курдук, 57 киилэ ыйааһыҥҥа Лев Павлов — Сунтаар ыччата уонна 61киилэ ыйааһыҥҥа Андрей Мидловец — Амма ыччата.
Лев Павлов Бразилия бөҕөһүн кытта тустууга 3:0 ахсаанынан кылбар кыайыыны сурунан уонна Казах бөҕөһүн 6-0 ахсаанынан кыайан полуфиналга таҕыста. Сарсыҥҥы күнүгэр Лев полуфиналга Грузия бөҕөһүн Лука Гвинджилияны 5-3 ахсаанынан кыайан финалга тустар чиэскэ тиксибитэ. Манна кини Америка тустуугун Люк Лилледаль диэн киһилиин тустан, 2-1 ахсаанынан биһиги уолбут олус кыһыылаахтык хотторуу хомолтотун биллэ. Баҕар итиннэ Лев хара маҥнайгыттан кимэн киириэхтээҕэ, күүскэ үлэлиэхтээҕэ эбитэ дуу… Оннук тустуу буолуохтааҕа хаалла. Ол да буоллар Сунтаар бөҕөһө, биһиги үрдүккэ эрэнэр уолбут Лев Павлов бүтүн Аан дойдутааҕы тустуу чөмпүйэнээтигэр кырасыабай киирсиилэри көрдөрөн, 57 киилэ ыйааһыҥҥа үрүҥ көмүс мэтээл хаһаайына буолла.
Саха сирэ уонна төрөөбүт дойдутун дьоно кининэн уонна тириэньэрдэринэн киэн туттар. Манан киирсии бүтүө суоҕа, инники өссө күүстээх, чаҕылхай хапсыһыылары көрүөхпүт турдаҕа.
Яков Афанасьевич ВАСИЛЬЕВ, 90 саастаах
улуус ытык кырдьаҕаһа.
(хаартыска куйаар ситимиттэн ылылынна)