Саха норуодунай поэта Леонид Попов сарсын, атырдьах ыйын 14 күнүгэр, төрөөбүтэ 105 сылын туолар күнэ. Бу күнү көрсө кини аатын сүгэр улуустааҕы киин бибилэтиэкэҕэ «Ырыа буолбут олох» диэн поэт кинигэлэрин быыстапката тэрилиннэ.
Леонид Андреевич барыта 38 хоһоон, поэма, кэпсээн кинигэлэрин бэчээттэппитэ, ол иһигэр 13 кинигэтэ нууччалыы тылга тылбаастаммыт. Ону тэҥэ, үгүс хоһоонноро сэбиэскэй кэмҥэ бырааттыы омуктар тылларыгар тылбаастанан тахсыбыта. Бэйэтэ эмиэ тылбаасчыт быһыытынан хас да бөдөҥ айымньылары сахатыппыта. Кини таптал уонна гражданскай лирикаҕа күүстээх поэт быһыытынан биллэр. Үгүс хоһоонноро ырыа буолан уостан түспэккэ билиҥҥэ диэри ыллана сылдьаллар.
Быыстапкаҕа киин бибилэтиэкэ кинигэнэн хааччыйыы отделын сэбиэдиссэйэ Мария Федорова поэт олоҕун, айар үлэтин туһунан сэргэх бэсиэдэ оҥордо. Суруйааччы олорбут олоҕо, суруйан хаалларбыт кинигэлэрэ умнуллубат өйдөбүл.
Улууспут олохтоохторун Сунтаардааҕы киин бибилэтиэкэҕэ быыстапкаҕа күүтэллэр.
Алена Иванова