СӨ доруобуйатын харыстабылын миниистирин бастакы солбуйааччыта Дмитрий Сергин салайааччылаах бырабыыталыстыба отчуотун туруорар бөлөх үлэтин олунньу 11 күнүттэн Толоон, Күүкэй нэһилиэктэриттэн саҕалаата.
Бөлөххө Егор Чичигинаров — СӨ тыа хаһаайыстыбатын уонна аска-үөлгэ бэлиитикэтин министиэристибэтин ас-үөл уонна астыыр-үөллүүр бырамыысыланнаһын салаатын салайааччыта, Олег Сенюшкин — суол-иис хаһаайыстыбатын салалтатын техническэй отделын салайааччыта, Николай Дмитриев — СӨ норуот айымньытын дьиэтин генеральнай дириэктэрин солбуйааччыта, Андрей Николаев Ил-Түмэн дьокутаата бааллар. Ону тэҥэ, Сунтаар улууһун тэрилтэлэрин салайааччылара, үлэһиттэрэ кытыннылар.
Бөлөх салайааччыта Дмитрий Сергин отчуот ыытыллар Толоон нэһилиэгэр»Сардаана» КК улууска биллэриллибит С.А.Зверев-Кыыл Уолун сылын көрсө улуу киһи айар үлэтин, олоҕун кэпсиир хаартысканан быыстапка турбутун сэргии көрбүтүн эттэ. Онтон салгыы СӨ бырабыыталыстыбата ааспыт сылга ыыппыт үлэтин билиһиннэрдэ. Бырабыыталыстыба сүрүн соругунан нэһилиэнньэ олоҕун тупсарыы, дьадайыы таһымын намтатыы, дьон тус дохуотун үрдэтии буолар.
Толоон нэһилиэгин олохтоохторо доруобуйа харыстабылын министиэристибэтиттэн тустаах үлэһит кэлбитинэн элбэх киһини долгутар ыйытыгы хат дьахтар куоракка төрүүрүн туһунан ыйыттылар. Бу ыйытыкка Дмитрий Сергин бэйэтэ хоруйдаата:»Бастатан туран хат дьахтар, саҥа төрөөбүт оҕо доруобуйата хаһан баҕарар инники күөҥҥэ турар. Ол иһин куттал суоһаабатын диэн толору хааччыллыылаах перинатальнай кииҥҥэ төрөтөр буоллубут. Билигин өрспүүбүлүкэ үрдүнэн саҥа төрөөбүт оҕо өлүүтэ биллэ кыччаата. Бу көрдөрүү элбэҕи этэр». Толоон нэһилиэгин олохтоохторо бырабыыталыстыба үлэһиттэриттэн өрөспүүбүлүкэҕэ уматык үрдээһинин, улууска бурдук кэлиитин, бэйэ дьыалатын тэринии уо.д.а. долгутар ыйытыктарын биэрдилэр. Хас биирдии ыйытыктарыгар наадыйар хоруйдарын толору ыллылар. Ону тэҥэ, былырыын туруорбут этиилэр туолууларын иһиттилэр. Түмүккэ, СӨ бырабыыталыстыбатын отчуотун «биһириибит» диэтилэр.
Онтон салҕыы бөлөх Күүкэй нэһилиэгэр үлэлээтэ. Дмитрий Сергин өрөспүүбүлүкэ ситиһиилэрин, ыытар үлэлэрин дьоҥҥо тиийимтиэтик, өйдөнөрдүк кэпсээтэ. Күүкэй нэһилиэгин үөрэҕириитин тэрилтэлэрэ оскуола хапытаалынай өрөмүөнүн уонна уһуйаан тутуутун туруорустулар. Улууска үөрэҕирии тэрилтэлэрин хапытаалынай өрөмүөннэрэ үгүстэрэ федеральнай тосхоллорунан бараллар. Кэпсэтии түмүгүнэн Күүкэй оскуолатын өрөмүөнүн боротокуолга киллэрдилэр.
Күүкэйгэ уһуйаан тутуллубута 16 сыл буолла. Проектнай-сметнай документациятын бэлэмнээтэххэ уочаракка киириэн сөп диэн иһитиннэрдилэр. Этиэххэ баҕарыллар, улууска Күүкэй нэһилиэгэ оҕо төрөөһүнүгэр үрдүк көрдөрүүлээх. Ону таһынан, нэһилиэккэ интэриниэт ситимэ сүгүн үлэлээбэтин, Кутана-Күүкэй хайысхатынан суол өрөмүөнүн, нэһилиэккэ уот мөлтөҕүн туруорустулар. Мария Николаева аҕам саастаах энтузиаст учуутал-настаабынньык: «Биһиги нэһилиэкпит олус баай историялаах, биллэр-көстөр дьон төрөөн-үөскээн тахсыбыт ытык сиринэн буолабыт. Дойдуга бэриниилээх дьону иитэн таһаарыыга түмэл үлэтэ олус суолталаах. Онон патриотическай иитиигэ туһуламмыт түмэл баар буоларын туруорсабын». Бу аҕам саастаах киһи этиитин бары сэргии иһиттилэр. Күүкэйдэр СӨ бырабыыталыстыбатын отчуотун «биһириибит» диэн сыаналаатылар.
Мира АФАНАСЬЕВА