Дойду Бэрэсидьиэнэ Владимир Путин олохтообут «Олорор дьиэ уонна куорат эйгэтэ» национальнай барыл иитинэн, «Хаарбах дьиэттэн дьону көһөрүү» анал бырагыраама Сунтаарбыт улууһугар тэтимнээхтик үлэлиир. Маннык бырагыраама дьон олорор усулуобуйата тупсарыгар туһаайыллан, олохтоох дьоҥҥо көдьүүстээҕин бэлиэтии көрөбүт.
Ол курдук, бүгүн Күүкэй нэһилиэгэр саҥа, тупсаҕай, толору хааччыллыылаах, 4 кыбартыыралаах таас дьиэни үөрүүлээх быһыыга-майгыга арыйдылар. Тутууну Анатолий Исаев салайааччылаах «Главстройкомплекс» хааччахтаммыт эппиэтинэстээх уопсастыба түргэн кэм иһинэн, хаачыстыбалаахтык тутан үлэҕэ киллэрдэ. Саҥа дьиэ үөрүүлээх арыллыытыгар Раиса Саввинова сахалыы сиэринэн аал уокка айах тутан, алгыс сиэрин толордо. Кэлбит ыалдьыттары алаадьынан, кымыһынан күндүлээтилэр.
Бу, бэлиэ күҥҥэ улууспут баһылыга Анатолий Григорьев нэһилиэк баһылыгын Юрий Прокопьевы уонна олохтоохтору эҕэрдэлээн туран:
«Бу бырагыраамаҕа биһиги Ил Дархаммыт Айсен Сергеевич Николаев күүскэ туруорсан, Сахабыт сиригэр дьоммут-сэргэбит тупсаҕай көрүҥнээх дьиэлэргэ көһөн олороллоругар, улахан күүстээх үлэни ыытан, элбэх үбү көрдөрөн улууспутугар элбэх дьиэ тутуллан киирдэ. Хаһыс да сылын дьоҥҥо туһалаах бырагыраама үлэлии турарыгар махтаныах эрэ тустаахпыт» – диэн эттэ.
Салгыы үгэс быһыытынан аалай кыһыл лиэнтэни кырыйан, сырдык, сылаас кыбартыыралар күлүүстэрин саҥа дьиэ хаһаайыттарыгар туттардылар. Ол курдук, бу дьиэҕэ Аллайыаха курдук ыраах улуустан үлэлии кэлбит Светлана Сокольникова күлүүс тутан үөрүүтэ үгүс, махтала муҥура суох. Ону тэҥэ, бэтэринээр-бырааһынан үлэлиир Татьяна Елисеева үөрүүтүн маннык үллэстэр: «Күүкэйгэ кэлэн үлэлээбитим биир сыл буолла. Саҥа дьиэҕэ киирбиппиттэн олус үөрэбин уонна махтанабын».
Елизавета ТИТОВА