Быйыл сүрдээх үчүгэй, быйаҥ сайын ааста. Бастаан хайдах эрэ ардах кэлэн түс да түс буоларыттан тыа дьоно сэрэхэдьийэ санаабыттара. Буолумуна, былырыын сайыҥҥы саамай эппиэттээх кэмҥэ – оттуур саҕана быыстала суох ардах кэлэн түһэн, дьону сүгүн оттоппотоҕо. Оттон быйыл “баһаалыста оттооҥ, күөх сайын быйаҥын сомсуҥ” диэбиттии бэртээхэй күн туран биэрдэ.
Быйыл улууспутугар 34 тыһ. туонна от бэлэмниир сорудахтаах этибит. Бу былаан 94,9 бырыһыан туолла диэн улуустааҕы тыа хаһаайыстыбатын управлениетын исписэлиистэрэ этэллэр. Ол аата 32260 туонна от оттоммут. Хаачыстыбата, быһа быраҕан ыллахха, ааспыт сыллааҕар үчүгэй. Дьиҥ анаалыһы тустаах уорганнар бэрэбиэркэлээн түмүк таһыарыахтара турдаҕа.
“Кириэстээх” кээпэрэтиип — 2836, “Достижение” Сунтаарга — 510, “Ил Тосхол” кээпэрэтиип 600 туонна сиилэһи уган, кэлэр кыстыкка сүөһү эбии аһылыгын бэлэмнээтилэр.
Онон кэлэр кыстыгы этэҥҥэ туоруурга сөптөөх сүөһү аһылыга баар курдук. Бу манна кыстыгы туоруурга күн-дьыл туруга эмиэ оруоллааҕа биллэр. Этэҥҥэ эрэ буоллун.
Оттон бурдук үүнүүтэ хайдах эбитий? Күндэйэтээҕи “Үүнүү” хаһаайыстыба быйыл бурдуга хаһааҥҥытааҕар да өлгөмнүк үүммүт. Тойбохойго «Тойбохой тыа хаһаайыстыбатын кээпэрэтиибэ (салайааччы Алексей Сидоров) быраҕыллан турбут сири таҥастаан, быйыл сэлиэһинэйи ыспыта үрдүк үүнүүнү биэрбит.
Оҕуруот аһа да син үүммэхтээтэ курдук. Холобур, Куокуну агрооскуолата, Элгээйигэ бааһынай хаһаайыстыбалаах Игорь Яковлев, Маргарита Сидорова өлгөм хаппыыста хомуйан нэһилиэнньэҕэ атыылыыллар, дуогабардаах тэрилтэлэригэр тиксэрэллэр. Бүлүүчээҥҥэ урбаанньыт Андрей Максимов олордубут моркуоба, сүбүөкүлэтэ эмиэ үчүгэй үүнүүнү биэрдэ. Онон сотору урбаанньыт бэйэтэ үүннэрбит оҕуруотун аһын маҕаһыыннар атыыга тахсарын күүтэбит.
Үүт соҕотуопкатыгар улууска сыллааҕы былаан – 6689 туонна. Билиҥҥи туругунан 5897 туонна үүт соҕотуопкаланна. Санатан этэр буоллахха, улууспутугар 5 соҕотуопкалыыр тэрилтэ үлэлиир. Үүт туттарааччылар харчыларын кэмиттэн кэмигэр ыла олороллор.
Ааптар: Яина ВЛАСЬЕВА