Сэтинньи 21-27 күннэригэр Псков уобалаһын Великие Луки куоратыгар оҕунан ытыыга Бүтүн Арассыыйатааҕы «Надежда России» эдэрдэргэ күрэхтэһии буолан ааста. Бу күрэхтэһиигэ уопсайа 600-тан тахса эдэр спортсмен Арассыыйа 32 эрэгийиэниттэн кытынна. Ол иһигэр Саха сириттэн эмиэ.
Сылын аайы ыытыллар күрэхтэһиитигэр биһиги кыыспыт, Арассыыйа оҕунан ытыыга эдэрдэргэ сүүмэрдэммит хамаандатын чилиэнэ, араас таһымнаах элбэх күрэхтэһиигэ аата үгүстүк ааттаммыт, кыайыы көтөллөөх сылдьар кыраҕы харахтаах охчут кыыспыт Мария Тараярова ситиһиилээхтик кытынна. Ол курдук, кини бу Арассыыйа үрдүнэн ыытыллыбыт күрэхтэһиигэ 18 саастаахтарга диэри охчуттар күрэстэригэр чөмпүйүөн буолла.
Кыыспытын үрдүк ситиһиитинэн истиҥник эҕэрдэлиибит. Кытаат, Мария, өссө да үрдүк дабайыылары ситиһэн биир дойдулаахтаргын, дьоҥҥун-сэргэҕин үөрдэ сырыт.
Оттон А.И.Иванов аатынан олимпийскай эрэллэри бэлэмниир өрөспүүбүлүкэтээҕи оскуола иитиллээччитэ Виктория Ераскумова буулдьанан ытыыга Приморскай кыраай Кубогын иһин күрэхтэһиигэ бастыҥ буолла. Онтон биирдиилээн бастыыр иһин күрэхтэһиигэ көрүҥнэринэн иккис уонна үһүс миэстэлэри ылла. Виктория бу күрэхтэһии түмүгүнэн Арассыыйа маастарга хандьыдаатын нуорматын толордо. Ону сэргэ аны сайын ыытыллар «Дети Азии» норуоттар икки ардыларынааҕы оонньууларга кыттар путевканы ылла.
Яина ВЛАСЬЕВА