Бүгүн «Ньургуһун» оҕо сайдар киинигэр үөрүүлээх түгэн. Ол курдук, Үүнэр көлүөнэ тус сыаллаах пуондата тэриллибитэ 30 сылыгар анаммыт «Кэлэр кэми бииргэ уһансабыт» диэн өрөспүүбүлүкэтээҕи күрэс ыытыллыбыта. Бу күрэс чэрчитинэн «Инносфера- 2023» оҕо инновационнай кииннэрин өйүүр сыаллаах ыытыллыбыт грант куоҥкуруһун түмүгүнэн, Сунтаардааҕы 5-с нүөмэрдээх «Ньургуһун» оҕо сайдар киинин бырайыага 10 бастыҥнар истэригэр киирэн, кыайыылааҕынан тахсан, бүгүн бырайыак олоххо киирэн, үөрүүлээх аһыллыыта буолла.
Бу киин «Ньу студио» диэн ааттанан аныгы ирдэбилгэ эппиэттиир толору тиэхиньикэнэн хааччыллыылаах. Манна оҕолор үс омук тылын сайыннарыыга тирэҕирэн, иитээччилэрин көмөтүнэн араас ойуулуктары (мультиктары) оҥорор, араадьыйаҕа, видеоҕа устар кыахтаннылар. Кэлэктиип, уһуйаан иитиллээччилэрин инновация эйгэтигэр бастакы хардыыларын оҥороллоругар, аныгы олох ирдэбилинэн, үүнэн-сайдан тахсалларыгар күүс-көмө, тирэх буолуоҕа диэн эрэнэбит.
Алена ИВАНОВА