Оскуола үөрэнээччилэригэр уруоктарын таһынан «Разговоры о важном» диэн кылаас чаастарыгар араас хабааннаах темаларга анаан кэпсэтиилэр, көрсүһүүлэр тэриллэллэр.
Бүгүн холобур, уруок кэннэ А.П.Павлов аатынан Сунтаар 1-кы N-дээх орто оскуолатыгар 6 «в» кылаас үөрэнээччилэрэ (кылаас сал. Тимофеева Галина Валерьевна) бу соторутааҕыта буолан ааспыт быыбарга кыттыбыт Жанна Макарованы ыҥыран көрсүстүлэр. Санатар буоллахха, Жанна Петровна Сунтаар улууһун дьокутааттарын быыбарыгар Сунтаардааҕы 9-с N-дээх быыбардыыр уокурукка дьокутаатынан талыллыбыта.
Оҕолор төһө даҕаны баара-суоҕа 6-с эрэ кылаас буоллаллар, быыбар диэн тугун-ханныгын уонна дьэ дьокутаат диэн ким буолуон сөбүн чопчуластылар. Сүрдээх көхтөөх, бииртэн биир ыйытыыны биэрэн көрсүһүү олус сэргэхтик биир тыынынан түргэн баҕайытык ааста. Манна саамай киһи сэргиирэ диэн, оҕолор бу кылаас чааһыгар кэлбит ыалдьыттан бу курдук ыйытыылары биэрдилэр: 70 лет Октября уулусса барыта бадараан, хаһан оҥороллоро буолуой, бассейн хаһан үлэҕэ киирэн сөтүөлүөххэ сөп буоларый, оскуолаҕа оҕолор ыттарын илдьэ кэлэллэрин иһин олус элбэх ыт мустар дуу о.д.а. күннээҕи олус долгутуулаах ыйытыылары биэрэн соһуттулар. Бу оҕолор болҕомтолоох буолан төрөппүттэрэ этинэр кыһалҕаларын, күннэтэ бэйэлэрэ кэтээн көрүүлэрин сатаан сааһылаан бачча саастарыгар этинэллэрэ сөҕүмэр диэн кинилэргэ ыалдьыттаабыт Жанна Петровна санаатын үллэстэр.
Көрсүһүүгэ оҕолор өссө билиҥҥи кэмҥэ ханнык идэлэр ордук наадалаахтарын туһунан кэпсэтистилэр. Түмүккэ ыалдьыттарыгар Жанна Петровнаҕа оҕолор улааттахтарына ханнык идэни баһылыахтарын баҕаралларын кумааҕыга суруйан туттардылар. Оҕолор бары саҥалаах-иҥэлээх, чуопчааран элбэҕи сэһэргэһэр дьон буолан биэрдилэр. Ыалдьыттарыгар махтанан, күргүөмүнэн үөрэ-көтө бакаалаһа хааллылар.
Ааптар: Юлия АЛЕКСЕЕВА.
