Сунтаар улууһугар 1555 самоходнай тимир көлө учуокка турар. Онтон элбэх ахсаана Күндэйэ нэһилиэгэр. Бу күннэргэ тырахтарыыстар окко киирээри тимир көлөлөрүн тиэхиньиичэскэй көрүүтүн аастылар.
Сайын үтүөтүгэр Күндэйэ биир сарсыардата тыраахтар бирилиир тыаһынан туола түстэ. Сунтаартан Гостехнадзор иниспиэктэрэ тахсан бэрэбиэркэ ыытта. Кэлбит тырахтарыыс барыта тимир көлөтүн көрдөрөр төлөбүрүн оҥоро-оҥоро тыраахтардарын бэрэбиэркэлэттилэр.
Николай Терентьев «Донфенг» тыраахтардаммыта уонча сыл буолла. Бэртээхэй тимир көлөлөөхпүн диэн киэн тутта кэпсиир. Онтон Николай Ощепков дьиэ кэргэнинээн тыа хаһаайыстыбатынан «Агростартап» барылынан ылыммыт «Синтайдарын» уонна прицептаах «Беларустарын» учуокка туруораары сүбэ-соргу ылаллар. «Бэрэбиэркэ күнүгэр көрдөрөн туран тыраахтарым нэһиилэ эстэн кэллэ» диэн күчүмэҕэйдэнэр дьон эмиэ баар.
Гостехнадзор инисптэктэрэ Евгений Николаев солотугар үлэлээбитэ бэһис сыла. Былырыын салалтата саҥа «Нива» массыына көрөн үлэтигэр төһө эмэ көмөлөөх буолла. Кини улууһугар эрэ буолбакка, Анаабырга, Өлөөҥҥө тиийэ идэтинэн көмө үлэһит буолар.
Санатан эттэххэ, тыраахтар быраабын Сунтаардааҕы технологическай колледжка, Сунтаар 2 №дээх, Күүкэй оскуолаларыгар үөрэнэн ылыахтарын сөп. Эһиил Куокунуга эмиэ үөрэнэр буолуохтара.
Үгүс тырахтарыыстар бэрэбиэркэни от иннигэр ааһан «һуу» диэт күргүөмнээх үлэҕэ туруннулар. Оттон Гостехнадзор иниспиэктэрэ салгыы Түбэй диэкки айан тутар.
Тускулаана ГОРОХОВА-КОБЕЛЬЯНОВА