Кулун тутар 29-30 күннэригэр Санкт-Петербург куоракка «Үгэстэри харыстыыбыт» («Сохраняем традиции») норуоттар икки ардыларынааҕы фольклор бэстибээлэ ыытылынна.
Бэстибээлгэ биһиги улууспутуттан хас да бөлөх баран кыттан ситиһиилэммиттэрин туһунан «Күбэйэ» үҥкүү ансаамбылын салайааччыта Николай Баянаев иһитиннэрдэ. Ол курдук, Александра Яковлева салайааччылаах «Кылыһах» фольклор бөлөҕө Гран-при буолбут. Оттон Николай Витальевич салайар «Күбэйэ» үҥкүүһүттэрэ 1 истиэпэннээх лауреат аатын ситиспиттэр. Кэмпэндээйиттэн икки бөлөх барбытыттан иккиэн эмиэ ситиһиилэннилэр. Ол курдук,Евгения Эверстова, Анна Тотонова салайааччылардаах «Туус Кэнэли», «Сахам алаадьыта» үҥкүү бөлөхтөрө иккиэн 2 истиэпэннээх лауреат буолбуттар.
Ону сэргэ төрүт култуураны, фольклору тарҕата сылдьар Анна Тотоноваҕа, Николаев Баянаевка, Эльвира Эверстоваҕа, Александра Алексееваҕа бэстибээли тэрийээччилэр махтал суруктары туттарбыттар.
Биир дойдулаахтарбытын бу ситиһиилэринэн истиҥник эҕэрдэлиибит.
Манна даҕатан эттэххэ, бу бэстибээл 2018 сылтан Санкт-Петебурга ыытыллар эбит. Манна үгүс ахсааннаах омук олорор модун Арассыыйа уонна тас дойдулар талааннаахтара мустан бэйэлэрин омуктарын үгэһин, ырыатын-тойугун, үҥкүүтүн-битиитин билиһиннэрэр, бэйэ-бэйэни кытары билсиһэр, доҕоруу сыһыаннара үөскүүр былаһаакката буолар.
Яина ВЛАСЬЕВА