Аҕыйах хонуктааҕыта Сунтаар нэһилиэгэр баар элбэх кыбартыыралаах дьиэҕэ саахал тахсыбытын туһунан сырдатан турабыт. Ол эбэтэр, дьиэ анныгар баар куһаҕан ууну ыытар турба бүөлэнэн, тоҥон улахан харгыһы үөскэттэ.
Манна улуус уонна нэһилиэк дьаһалтата сөптөөх дьаһаныыны түргэнник ылынан, баар тэрилтэ үлэһиттэрин өрө туруоран, тахсыбыт быһылааны туоратарга үлэни ыыта сылдьаллар. Маны тэҥэ бүгүн, ахсынньы 7 күнүгэр, Советская 72 уонна Цеолит 18 аадырыска баар дьиэлэр саахалларын түргэн кэм иһинэн туораттылар. Ити эрээри, олохтоох дьон турба туохтан тоҥорун улахаҥҥа уурбатыттан, дьон үлэтин сыаналаабат, халы-мааргы сыһыаныттан маннык саахал тахса туруон сөп. Ол курдук, куһаҕан ууну ыытар турбанан араас бөҕү-саҕы, ас тобоҕун, кытаанах эттиги быраҕартан туттунуохха наада. Ону тэҥэ, «Сунтаржилсервис» уонна «Жилкомсервис» хааччахтаммыт эппиэттээх тэрилтэлэр оҥорор өҥөлөрүгэр, төлөбүрү кэмигэр төлүөххэ наадатын хас биирдии киһи билиэх тустаах. Инники өттүгэр маннык харгыс тахсыбатын туһугар кыһаныаххайыҥ.
Елизавета ТИТОВА