Ааспыт сыл балаҕан ыйыгар муниципальнай быыбарга талыллыбыт «Сунтаар улууһа (оройуона)» муниципальнай оройуон 7-с ыҥырыылаах дьокутааттарын быыбардаабыппыт. Саҥа састаап бастакы тэрээһин мунньаҕар оройуон сэбиэтин бэрэссэдээтэлинэн Ульяна Дмитриевна Попованы талбыттара. Бүгүн биһиги хаһыаппытыгар, санатыы бэрээдэгинэн, дьон итэҕэлин биэрэн куоластаабыт дьокутааттара кимнээҕин уонна кинилэр дьокутаат корпуһугар ханнык хамыыһыйаҕа эппиэттииллэрин тустарынан билиһиннэриэхпит.
– Ульяна Дмитриевна үтүө күнүнэн! Кистэл буолбатах, сорох дьон биһиги дьокутааппыт ким этэй? диэн ыйытааччылар. Онон дьоммутугар-сэргэбитигэр оройуон сэбиэтигэр ханнык нэһилиэккэ, түөлбэҕэ кимнээх дьокутааттарын санатар бэрээдэгинэн билиһиннэрэ түһүөххэ эрэ.
– Ааспыт быыбарга оройуон 17 дьокутаатын талбыппыт. Ол курдук, Михаил Комин Түбэй Дьаархан, Түбэй, Сиэйэ нэһилиэктэрин дьокутаата. Оттон Күүкэйгэ уонна Кутанаҕа Михаил Евсеев талыллыбыта. Элгээйитээҕи уокурукка Элгээйи сорох чааһа, Маар Күөл быыбардыыр учаастак киирэр, манна Денис Павлов – дьокутаат. Дьуоҕалаахтааҕы уокурукка Хоро, Толоон уонна Элгээйи сорох өттө киирэр, бу нэһилиэктэр олохтоохторо Семен Поповка куоластарын биэрбиттэрэ. Күндэйэҕэ уонна Сунтаар нэһилиэгин сорох өттүгэр Ольга Лазарева – дьокутаат. Альберт Иванов Кэмпэндээйи, Устье, Хадан, Туойдаах нэһилиэктэриттэн дьокутаат буолбута. Сунтаарга кэмбинээт уокуругар Николай Данилов, пааркатааҕы уокурукка Петр Попов дьокутааттар. Жанна Макарова Сунтаар уокуругар, оттон Партизан өттүгэр Дмитрий Григорьев, Тумуһукааҥҥа Владимир Григорьев, Абаҕаҕа Сергей Тен, Бордоҥҥо, Илимнииргэ уонна Сунтаар нэһилиэгин сорох өттүгэр Игнат Яковлев, Тойбохойго, Уһун Күөлгэ Сардана Трофимова үгүс куолаһы ылан дьокутаат мандаатын туппуттара. Владимир Анисимов Кириэстээхтэн, Куокунуттан дьокутаат буолбута. Бүлүүчээннэр, наахаралар, дьаарханнар Андрей Максимовы талбыттара. Дьэ, бу курдук, саҥа састаабынан аны биэс сылга дьоммут интэриэстэрин көмүскүүргэ, улууспут сайдыытыгар үлэлэһэргэ бэлэммит.
Оройуон сэбиэтигэр алта хамыыһыйа баар. Ол курдук, правовой акталар туолууларыгар, сокуон уонна уопсастыбаннай бэрээдэк өттүн хонтуруоллуур мандаат хамыыһыйатын Михаил Комин салайар. Бүддьүөккэ, нолуок политикатыгар уонна былааннааһыҥҥа – Альберт Иванов. Үөрэҕириигэ, ыччат политикатыгар, успуорка уонна доруобуйа харыстабылыгар – Николай Данилов. Тыа хаһаайыстыбатын, урбаан уонна баайга-дуолга сыһыаннаһыыларыгар – Семен Попов, тутуу, бырамыысыланнас, ОДьКХ уонна суол хаһаайыстыбатын – Владимир Яковлев, социальнай политика, култуура уонна экология өттүгэр Игнат Яковлев бэрэссэдээтэллэр.
– Саҥа састааптаах оройуон сэбиэтэ хас сиэссийэни ыытта? Онно туох боппуруоһу көрдүгүт?
– Барыта 5 сиэссийэ буолан ааста. Ол курдук, бастакы сиэссийэбитигэр дьокутааттар бэйэбит испитигэр тэрээһин боппуруостарга үлэлээбиппит. Онно үлэбит былаанын кэпсэппиппит, бэрэссэдээтэли сэргэ, хамыыһыйаларга кимнээх үлэлиэхтэрин быһаарсыбыппыт. Кэлиҥҥи сиэссийэлэрбитигэр улуус бүддьүөтүгэр, Устаабыгар уларытыылары киллэрии, саҥа Балаһыанньалары көрүү, 2024 сыллааҕы бүддьүөтү бигэргэтии боппуруостара көрүллүбүттэрэ. Бу сылга киирэн баран бастакы сиэссийэбитин олунньуга былаанныыбыт.
Манна даҕатан эттэххэ, бу сэттис ыҥырыыга 17 дьокутааттан 12-тэ саҥа дьон. Биэс киһи хас да ыҥырыкка дьокутааттаабыттара. 13 эр киһи, 4 кэрэ аҥаар. Састаап өттүн этэр буоллахха, бары эйгэттэн бааллар – үөрэҕирии, бырамыысыланнас, култуура, тутуу, урбаан, тыа хаһаайыстыбата…
Ил Түмэҥҥэ эмиэ саҥа састаап талыллыбыта. Биһиги улууспут дьокутааттара Андрей Николаев, Афанасий Постников ахсынньыга кэлэ сылдьан, бары нэһилиэктэргэ сылдьан олохтоохтору кытта көрсүбүттэрэ, үлэ хайдах саҕаламмытын кэпсээбиттэрэ, дьон ыйытыытыгар хоруйдаабыттара. Ити сырыыларын кэмигэр Саҥа дьылынан уһуйааннарга, Тойбохойдооҕу оҕо дьиэтигэр бэлэхтэрин туттарбыттара. Ол курдук улуус дьокутааттара эмиэ бэйэлэрин уокуруктарынан элбэх оҕолоохторго, СВО-ҕа сылдьааччыларбыт дьиэ кэргэттэригэр эмиэ бэлэх ууммуттара.
Саҥа талыллан үлэлээн эрэр дьокутааттарга бары тутуспутунан күүстэрин түмэн, ким тугу кыайарынан улууспут сайдыытыгар күүскэ үлэлэһиэхтэрэ диэн эрэллээхпит.
Яина ВЛАСЬЕВА