От ыйын 4-8 күннэригэр Казань куоракка Бүтүн Арассыыйатааҕы «Пилоты Будущего» дрону салайыыга чөмпүйэнээт финала буолуохтаах. Ол курдук, «Тулпар» успуорт комплексыгар уонна «Урам» экстрим-пааркаҕа Арассыыйа 400 үөрэнээччитэ пилота суох авиационнай тиһик эйгэтин 10 көрүҥэр үөрүйэхтэрин көрдөрөн күрэс былдьаһыахтара.
Саха сирин чиэһин бу үрдүк таһымнаах күрэхтэһии финалыгар бастыҥ хамаандалар көмүскүөхтэрэ.
Сунтаарбыт улууһуттан Кутана орто оскуолатын информатикаҕа учуутала Владислав Третьяков салайааччылаах оскуола үөрэнээччилэрэ Антон, Артем Третьяковтар, Мичил Алексеев Саха сирин аатыттан кыттыахтара. Бүгүн Саха сирин хамаандаларын бырабыыталыстыба дьиэтигэр анаан көрсөн чөмпүйэнээккэ атаардылар. Кинилэр бүгүн түүн чөмпүйэнээккэ кытта көтөөрү бэлэмнэнэллэр.
Оҕолорбутунан киэн туттуоҕуҥ, кинилэргэ ситиһиилэри баҕарыаҕыҥ.
Санатар буоллахха, бу бырайыак «Движение первых» Арассыыйатааҕы оҕо уонна ыччат хамсааһынын, РФ дронунан сырсыы федерациятын уонна Татарстан өрөспүүбүлүкэтин тэрээһиннэринэн ыытыллар.
Марфа ИВАНОВА.