Бүгүн, сэтинньи 27 күнүгэр, Куокуну нэһилиэгэр СӨ култууратын үтүөлээх үлэһитэ, ССРС култууратын туйгуна, Сунтаар улууһун бочуоттаах олохтооҕо Розалия Николаевна Степанова аатын Куокуну олохтоох бибилэтиэкэтигэр иҥэрии үөрүүлээх түгэнэ буола турар.
Кини аатын үйэтитэн мемориальнай дуосканы арыйдылар. Розалия Николаевна өр сылларга бибилэтиэкэ эйгэтигэр үлэлээбит сыратын сыаналаан, улуус дьокутааттарын Сэбиэтин бу дьыл бэс ыйын 18 күнүнээҕи 06№ быһаарыытынан кини аатын иҥэрии туһунан ылыныллыбыта. Бу суолталаах тэрээһин бибилэтиэкэ уруогуттан саҕаланна. Манна Розалия Степанова туһунан ахтан-санаан ааһар элбэх иһитиннэрии ыытылынна. Салгыы «Кустук» култуура киинигэр дьоро тэрээһин үөрүүлээх арыллыыта саҕаланна. Ыраахтан-чугастан ыҥырыылаах ыалдьыттар кэллилэр. Ол курдук, Сунтаар улууһун дьокутааттарын Сэбиэтин бэрэссэдээтэлэ Ульяна Попова, Куокуну нэһилиэгин баһылыга Леонид Михалев, Сунтаардааҕы киин бибилэтиэкэ үлэһиттэрэ, салайааччы Изабелла Жиркова, нэһилиэк олохтоохторо, итиэннэ ыҥырыылаах ыалдьыттар бэйэлэрин эҕэрдэлэрин анаатылар.
Елизавета ТИТОВА