Бүгүн, ыам ыйын 18 күнүгэр, Сунтаардааҕы С.А. Зверев–Кыыл Уолун аатынан холбоһуктаах түмэл дьиэтигэр аан дойдуга бэлиэтэнэр түмэл күнүн чэрчитинэн коллекционердар быыстапкалара буолла.
Быыстапкаҕа Сунтаар улууһун коллекционердара сэдэх мунньар малларын дьоҥҥо көрдөрдүлэр. Араас манньыаты, кумааҕы харчыны, хаартыскалары, хаһыат ыстатыйаларын, кинигэлэри, мааркалары уо.д.а. элбэх сэдэх малы кэлбит дьон олус сэргии, кэрэхсии көрдүлэр. Быыстапка кыттыылаахтара тус коллекцияларыттан сэдэх экспонаттары түмэл пуондатыгар бэлэх ууннулар.
Маннык мунньар, коллекциялыыр дьарыктаах биир дойдулаахтарбытын түмэр, дьоҥҥо-сэргэҕэ таһаарар бэрт сэргэх тэрээhин быйыл иккис сылын ыытыллар.
Дмитрий ЫМЫЧАНОВ