Бүгүн, тохсунньу 22 күнүгэр, Сунтаардааҕы Ис дьыала уорганын үлэһиттэрэ Улуу Кыайыы 80 сылын, ону тэҥэ устудьуон күнүн көрсө Сунтаардааҕы технологическай колледж устудьуоннарыгар «Студенческий десант» диэн идэ хайысхатын талыыга туһуламмыт, олус сэргэх көрсүһүүнү тэрийэн ыыттылар.
Көрсүһүүгэ Сунтаардааҕы Ис дьыала отделын салайааччыта, полиция полковнига Анатолий Филатов, Ис дьыала отделын салайааччытын солбуйааччы, полиция салайааччыта, полиция подполковнига Анатолий Степанов, Ис дьыала отделын салайааччытын солбуйааччы, силиэстибийэлиир отдел салайааччыта, юстиция подполковнига Рустам Босиков, учаастак боломуочунайдарын үлэтин уонна сокуоннай саастарын ситэ илик оҕолор дьыалаларыгар салайааччы, полиция майора Сардаана Евсеева, Ис дьыала отделын салайааччытын солбуйааччы, полиция полковнига Валентина Алексеева уонна ГАИ салайааччыта, полиция капитана Сахайан Александров сокуону уонна быраабы көмүскүүр эйгэ үлэтин-хамнаһын уонна бу идэҕэ үөрэххэ киирии балаһыанньаларын сиһилии билиһиннэрдилэр. Ону тэҥэ, устудьуоннар оччотооҕу кэми сэгэтэн кэпсиир, баай ис хоһоонноох түмэлгэ киирэн, үлэлээн ааспыт үлэһиттэр тустарынан, итиэннэ киччэллээхтик хараллан турар урукку маллары сэҥээрэ көрдүлэр. Тэрилтэ иһинэн үлэлиир отделлары кэрийэн уонна соторутааҕыта саҥа арыллыбыт полиция пуунугар баран үлэһиттэр күннээҕи үлэлэрин, туох-хайдах быһыылаахтык дьаһаналларын чугастык билсэн экскурсиялаатылар. Маны сэргэ, ГАИ сотрудниктарын кытары уулуссаҕа тахсан, халтыраан кэмигэр суоппардарга суолтан сэрэхтээх буолуу туһунан анал буклеттары түҥэттилэр.
Бу көрсүһүүгэ уопсайа 20 устудьуон кэлэн кыттыыны ылла. Оттон, кинилэри Анастасия Аргылова уонна Татьяна Иванова иилээн, салайан илдьэ сырыттылар.
«Маннык хабааннаах көрсүһүүлэр, араас аахсыйалар ИС дьыала отделын кытта балай эмэ элбэхтэ тэриллэр. Оттон, бүгүҥҥү көрсүһүү арыый уратытык, интэриэһинэйдик буолла», — диэн Татьяна Иванова санаатын үллэстэр. Татьяна Октябриновна колледжка соцпедагогынан үлэлиир. Ону таһынан Сунтаардааҕы Ис дьыала отделын уопсастыбаннай сэбиэтин чилиэнэ буолар. Маннык тэрээһиннэргэ ыкса ситимнээхтик үлэлэһэр.
Ити курдук, бүгүҥҥү көрсүһүү устудьуоннарга олоххо тус сыаллаах буолалларыгар, итиэннэ идэни сөпкө талалларыгар ураты суолталанна.
Елизавета ТИТОВА