«Биир ньыгыл Арассыыйа» көҕүлээһининэн, 2021 сылтан үөрэҕирии тиһигэ сайдыытыгар үөрэнээччилэргэ табыгастаах усулуобуйаны, кинилэр сайдалларыгар бары кыаҕы тэрийэр сыаллаах «Новая школа» бырайыак олоххо киирэн үлэлиир. Бу партийнай бырайыак иһинэн тустаах оскуолаҕа үөрэммит эбэтэр манна сыһыаннаах, Аҕа дойдуларыгар бэриниилээх, үтүө холобурга сылдьар билиҥҥи кэм дьоруойдарын ааттара, хаартыскалара, кинилэр тустарынан суруйуулар, хорсун быһыыларын туһунан кэпсиир анал паарталары туруорар «Дьоруой паартата», үөрэнээччилэр саахымакка оонньуур таһымнарын үрдэтэр сыалтан, кинилэр өй-толкуй өттүнэн сайдалларыгар «Шахматы – школе», ону сэргэ «Киноуроки в школах России» хайысхалар бааллар. Маны таһынан бу үөрэхтээһин бырайыагын иһинэн элбэх аахсыйа буолар. Холобур, үөрэх дьыла саҕаланыыта «Собери ребёнка в школу», «Помощь школам», «Родительская приёмка» курдук аахсыйаларга элбэх киһи кыттар. Оскуолалар капитальнай өрөмүөннэрэ, о.д.а. хамсааһыннар эмиэ бу бырайыак чэрчитинэн ыытыллаллар.
Бу бырайыагы дойдубут Бэрэсидьиэнэ Владимир Путин тус хонтуруолугар тутар. Кини: «Үөрэтии ньымата саҥа таһымҥа тахсара — кэм ирдэбилэ. Ыччат чиҥ доруобуйалаах, киэҥ билиилээх, үөрэхтээх буоллаҕына, олохпут таһыма үрдүүрэ саарбаҕа суох», – диэн бэлиэтиир.
Бу аҕыйах хонуктааҕыта Кириэстээххэ анал байыаннай дьайыыга сылдьан сырдык тыына быстыбыт, бу нэһилиэк оскуолатыгар үөрэммит Платон Николаевка аналлаах паартаны туруордулар. Платону «Хорсунун иһин» уордьанынан өлбүтүн кэннэ наҕараадалаабыттара.
Бу тэрээһиҥҥэ кини дьиэ кэргэнэ кэлэн кытынна, Платон Иванович олоҕун, хорсун быһыытын туһунан үгүһү кэпсээтилэр.
Яина ВЛАСЬЕВА