Дойду бэрэсидьиэнэ Владимир Путин көҕүлээһининэн «Куттала суох уонна хаачыстыбалаах айан суоллара» национальнай бырайыагынан Кириэстээх нэһилиэгин иһинэн ааһар 3 км суол уһунун аспаалынан бүрүйүү үлэтэ ыытылла турар.
Үлэ ирдэбилинэн суолу икки араҥа аспаалынан бүрүйүөхтэрэ. Билигин бастакы араҥатын бүтэрэн иккис араҥа аспаалын кутууга киирдилэр. Уопсайа бу суол оҥоһуутугар 50мөл.солк үп федеральнай бүддьүөттэн көрүллэн үлэ тэтимнээхтик барар. 
Суол үлэтин “Сунтаравтодор” тэрилтэ ыытар. Генеральнай дириэктэр Феликс Павлов иһитиннэрбитинэн: “Суолу бэлэмнээһин үлэтэ ыам ыйыттан ыытыллыбыта онтон атырдьах ыйын бүтүүтүттэн аспааллааһын үлэтэ барбыта. Уопсайа икки сыл оҥоһуллуохтаах үлэни биһиги тэрилтэ бэйэбит үппүтүттэн үбүлээн бу күһүн бүтэрэр соруктаахпыт”. Аспаал үлэтэ бүппүтүн кэннэ суол бэлиэлэрин, знактарын ууруохтара. Оскуола аттыгар дьон туоруур бэлиэтигэр светофор туруоҕа.
Мира АФАНАСЬЕВА