Тылы-өһү сааһылаан, киирэр иэйиини истиҥ тылларынан ситимнээн хоһооҥҥо хоһуйуу ураты талаан.
Сунтаар улууһун Хаданыттан төрүттээх, билигин бочуоттаах сынньылаҥҥа олорор Олег Гаврилович Архипов 2020 сылтан саҕалаан хоһооҥҥо холонор. Кини ордук төрөөбүт дойдуларыгар бэриниилээх, сырдык тыыннарын эйэлээх олох иһин охсуспут уонна холобур буолар хорсун хоодуот саллаттарга, буойуттарга анаан хоһуйан таһаарар. Бу хоһооннор ис иэйиилэрэ киһини долгутар, киһи сэргээн ааҕар. Күндү ааҕааччыларбыт өрөбүл күн Олег Архипов хоһооннорун ааҕыҥ, сэргээҥ.
Юлия АЛЕКСЕЕВА.
Бастакы хомуурга барбыттарга
Саха саллаата
Эн манан сэриигэ барбытыҥ
Агдаары аннынан туорааҥҥын,
Турукта суолун тутаҥҥын
Туос сатыы хаамаҥҥын.
Бүлүү эбэттэн тэйэҥҥин,
Улуу Элиэнэҕэ тиийэҥҥин,
Борокуот аалга олорсоҥҥун,
Сахаҥ сириттэн арахсаҥҥын.
Ийэ дойдугун көмүскүү
Илбистээх өстөөҕү утары
Кытыастар уот үөһүгэр
Кыргыһыыга эн тиийбитиҥ…
01.08.23.с.
Кэриэстэбил
Бааллар этилэр кинилэр
Барантабыык бэттэрэ
Бэрилиини ылбыттар
Сэнэрээт, буомба аннынан
Сиэлэн хааман ааспыттар
Ыстаалыммыт куората
Ыктарыылаах кэмигэр
Ыстаал буулдьа аннынан
Ыга анньан тиийбиттэр,
Куурускайдыыр тоҕойу
Курдарыта ааспыттар
Иилимэнниир эбэҕэ
Мууһун устун барбыттар
Кэниигисбэр куораты
Кимэн киирэн ылбыттар
Кыргыһыылаах кытылтан
Кыайан хотон кэлбиттэр.
Хара мастаах тыалардаах,
Хатыҥнардаах чараҥнаах
Харыйанан кэриилээх
Хаанды эбэ сыһыылаах
Хатыйыы титирик күрүөлээх
Хатарыылаах быһахтаах
Хатан кымыс утахтаах
Хадан сирин дьонноро,
Хара дьайдаах өстөөҕү
Хааннарыгар чачатан
Хампы сынньан бараннар,
Торҕон түөкүн үөрдэрин
Тоҕу хааман тиийэннэр
Тохсус маайым буолтугар
Тобуктатан тураннар
Бэрилииҥҥэ тиийэннэр
Бэриннэрэн кээлтэрэ.
Кыһыл былаах тэлээрэн
Кыайыы буолтун биллэрэн
Өрөгөй талаан үрдээбит
Үөрүү- көтүү үксээбит
Үөрүүлэрдээх күннэрэ
Үүннэ бүгүн биһиэхэ
09.05.2020 с.
Ким да умнуллубат, туох да умнуллубат.
Сэрии кэмигэр тыылга
Ол сэрии сылларыгар
Оҕонньоттор, эмээхситтэр
Оҕо, дьахтар хааланнар
Олох ыарын билбиттэр.
Ыраах тыылга даҕаны
Ыардык ааспыт олох
Сойуомнарга сурутуу
Соролуура барытын,
Түһээн араас көрүҥэ
Төлөбүрү ирдиирэ.
Баары бары хомуйан
Боруоннарга ыытаннар
Кыайыы туһа диэхтээннэр
Биэрээхтииллэр этилэр.
Аһыыкалаах уот кураан
Аҕалбыта иэдээни
Аастыыр туордуур олохтор
Анньан тиийэн кээлтэрэ
Аччыктааһын буолбута.
Холхуос күүстээх үлэтэ
Холу таһынан буолаахтаан
Хотон муҥунан сүөһүнү
Хорҕотоохтоон олорон
Холкуос, холкуос аайытын
Хоргуйааһын буолбута.
Өлүү, сүтүү үксээбит
Өлбөт сүппэт туһуттан
Ону маны барытын
Оҥойорго укпуттар.
Халҕан бүрүө тириитин
Хастыы тардан сиэбиттэр,
Этэрбэстэр уллуҥун
Эмиэ кытта сиэбиттэр.
Киэһэ сиирэ суох буолан
Кылыгыр уунан хонооһун
Кыһалҕата тирээбит
Бэстиир сутука аһылыктаах
Бириэмэлэр бааллара,
Хаппыт тирии баҕалаах
Кэмнэр кэлэн ааспыттар.
Сатамматах саламта
Дьонун быыһыан оннугар
Туораах бурдук туһуттан
Туорайдаһан турбута
Тутуталаан сордуура.
Кыра аайы кыбытан
Кыра хара дьоннорун
Кыһайаахтаан биэрбитэ
Хаарыаннаахый дьоннору
Хаайыыларга ыыппыта.
Дьаамаларга симпитэ
Дьаабы дьыала буолбута
Уоннуу, биэстии киһинэн
Умуһахха угаттаан
Уҥуохтарын туппута.
Хастыы даҕаны киһинэн
Халдьаайыга таһаартаан
Хара буорга көмөттөөн
Харах уутун таһаарта.
Ыарыы, өлүү аргыстаах
Ыарык баттык олохтор
Оччотооҕу кэмнэргэ
Олус үгүс сирдэргэ,
Сахам сирин үрдүнэн
Сатыылаахтаан ааспытын
Билигин кэлбит көлүөнэ
Билээхтээбэт букатын.
05.2020 с.
Сүрэхпэр эн бааргын
Ханна да буолларбын
Хадаммын эйигин,
Агдаарым хонуутун
Ахтабын куруутун
Бэс чагда ойуургун,
Хатыҥнаах чараҥҥын,
Дьэдьэннээх кырдалгын,
Чэчиктээх сыһыыгын
Онно саас аайытын
Ньургуһун тылларын,
Күөрэгэй ыллыырын
Дьурулуу туойарын
Ыраата сылдьаммын
Сылаастык саныыбын,
Сүрэхпэр өрүүтүн
Хаданым, эн бааргын.
27.03.22.с.
Күһүн
Балаҕан ыйын саҥата
Баар ойуурга барыта
Булдун алдын арааһа
Буспут отоно даҕаны.
Көмүс алтан өҥүнэн
Күһүн тиийэн кэллэ дии
Көҕөрөн турбут мутукча
Көтөҕөҕө кубулуйда.
Айылҕа барахсан
Араас да көстүүлээх
Ама мантан ордугу
Айыа тутуо буоллаҕай.
Сиккиэр тыалга тэлээрэн
Сэбирдэхтэр көттүлэр
Сиргэ кэлэн түстүлэр
Сэргэстэһэ сыттылар.
Ыксабытыгар сылдьыбыт
Ыллыыр- туойар чыычаахтар
Ыраас күннээх халлааҥҥа
Ыраах соҕуруу көттүлэр.
Күһүн, күһүн барахсан
Күлүм чаҕыл күннэргэ
Күлүмүрдээн түһэҥҥин
Көстүүлэриҥ кэрэтиэн.
24.09.20с.
Албан аат дьоруойга
Эҕэрдэ тылын этэбин
Эйиэхэ, Эбсиэйэп Билиипкэ,
Арассыыйа үрдүнэн
Албан аатыҥ дуорайда.
Сунтаар сирэ ааттанна,
Сахаҥ сирэ билиннэ,
Күндэйэ үрдүнэн
Күн үөһэ күөрэйдэ.
Куурускай тоҕойугар
Кырыктаах кыргыһыыга
Баара эһэҥ Бааһыҥка,
Бастыҥ киһи Ньукулай.
Аҕыс уон сыл кэнниттэн
Ахтылынна ол онно
Аҕа дойду сэриитин
Албан ааттаах буойуна.
Киэн туттабын эйигинэн,
Килбиэннээх кыайыыгынан!
Үйэлэргэ ааттанан
Үрдэллэргэ туруоҥ, Эн!
25.08.2023с.