«Тураах хара дьүһүннэммитэ» диэн биир дойдулаахпыт «Саха» НКИХ сакааһынан “Кэрэмэс” анимационнай студия Анатолий Афанасьев оҥорбут ойуулуга ахсынньы 26 күнүгэр күнүс 14.00ч. “Чохоон” оҕо ханаалыгар сүрэхтэниэҕэ. Ойуулук Саха норуотун остуоруйатыгар олоҕурбут.
Ааптар, туруорааччы режиссёр Анатолий Афанасьев кылгастык ойуулук ис хоһоонун бу курдук кэпсээтэ: “Былыр, бастакы кыһыннар турар кэмнэригэр, тураах үрүҥ дьүһүннээх этэ. Кини сылаас дойдуларга хойут сырыыланан баран инники тиийэринэн киһиргиир идэлээҕэ. Ол иһин атын көтөрдөр үрүҥ турааҕы кырыы харахтарынан көрөр буолбуттар… Ситэритин сарсын “Саха” НКИХ “Чохоон” оҕо ханаалыгар көрөөрүҥ” диэн үллэһиннэ. Санатан этэр буоллахха, талааннаах Анатолий Афанасьев билигин Дьокуускай куоракка көһөн ойуулук оҥорор.
Кини бу иннинэ “Мичийээнэ”, “Чысхаан аптаах үтүлүгэ” диэн ойуулуктары оҥорбутун сэргии көрбүппүт.
Мира АФАНАСЬЕВА