Кэнчээри ыччаты ырыаҕа, кэрэҕэ иитиигэ, сайыннарыыга олоҕун анаабыт Сунтаардааҕы 2-с нүөмэрдээх «Сардаана» оҕо сайдар киинин үрдүк категориялаах муусука салайааччыта Вера Яковлева алтынньы 7 күнүгэр 65 сааһын томточчу туолла.
Кини уһуйааҥҥа биир күннээх дьарыга хайдах ааһарын билиһиннэриэм. Ытыктыыр кэллиэгэбит Вера Иосифовна идэтин дириҥник баһылаабыт, баай уопуттаах үлэһит. Кини дьарыктарыгар араас ньымалары туттан, ол курдук ырыаны эрэ буолбакка, үҥкүү хамсаныыларын, музыкальнай инструменнар доҕуһуолларын, оҕо муусука эйгэтигэр киирэрин аантан саҕалаан бэлэмниир. Аан бастаан сөпкө тыыныыга, дорҕоонунан үөһээ, аллараа ырыа матыыбын сөпкө таһаарыыга үөрэнэллэр, ырыаларын хатылыыллар. Вера Иосифовна куруук ырыа ис хоһоонунан араас бэридимиэттэри, ньымалары туттар. Холобур, куукула туһунан ырыа буоллаҕына куукуланы киллэрэн билсиһиннэрэр, ырыаҕа кини туһунан туох кэпсэммитин оҕолорго быһаарар. Ол кэннэ оҕолор саҥа ырыаны үөрэтэллэр. Ол ыллыы олороннор куукуланы кытары бииргэ хамсаналлар. Ити курдук муусука дьарыгын Вера Иосифовна оҕолор интэриэстэрин тардан, кинилэр ырыа эйгэтигэр киирэллэрин ситиһэр.
Төрөппүттэр муусука дьарыгар анаан таҥас тиктэрэллэр. Оҕолор таҥастарын кэтэн муусука эйгэтигэр үөрэ-көтө киирэллэр. Бу оҕо ис турукка киириитигэр, эппиэтинэстээх буолуутугар бэлэмниир. Биһиги, иитээччилэр, музыкальнай салайааччыбытын кытта бииргэ сүбэлэһэн араас аралдьытыылары, бырааһынньыктары тэрийэн ыытабыт, оҕолорго умнуллубат бэлиэ түгэннэри бэлэхтиибит.
Түгэнинэн туһанан, Вера Иосифовнаҕа баай уопутун үллэстэн эдэр иитээччилэргэ үтүө холобур буолан сүбэ-ама биэрэ сылдьаргар махтанабыт. Айар үлэҕэр өссө да ситиһиилэри, тус олоххор дьолу баҕарабыт.
Таисия НИКОЛАЕВА.