Тойбохойго кэпэрэтииби тэрийии туһунан бастакы тэрээһин мунньах буолан ааста. Тэрээһин мунньахха улуустааҕы тыа хаһаайыстыбатын управлениетын начальнига Владимир Анисимов, «Хочо» ГУП салалтатыттан Григорий Готовцев,Владимир Уаров, олохтоох дьаһалта баһылыгын солбуйааччы Айаал Леонтьев кытыннылар. «Кыһалҕа эмээхсин кыһыл талах кымньыылаах» диэн өбүгэлэрбит өстөрүн хоһооно этэринии, кырдьан, үлэни кыайбат буолбут дьон сүөһүбүтүн эһэн, ытыс соттор санаабыт суох. «Саха ынах сүөһүнү, сылгыны иитэрин тухары саха диэн аатырар» диэн өйдөөх дьоммут этэллэр, суруйаллар.
Ынахтарбытын эрэллээх көрөр-харайар тэрилтэҕэ кыстатан баран, сайын бэйэбитигэр ылан ыан дьоммутун аһатан, арыы хаһаанан уонна саамай кылаабынайа сиэннэрбитин ынах ыырга, ньирэй аһатарга үөрэтэн, үлэҕэ сыһыаран, окко кытыннарар санаалаахпыт. Оҕо кыратыттан үлэлиэхтээх.
Мунньахха кэлбит дьоҥҥо ынаххытын кэпэрэтиипкэ биэрдигит да, сүөһү төбөтүгэр көрүллэр харчыны ылбаккыт диэн быһаарыы биэрдилэр. Ол сыыһата көстөн турар. Ынах кыстыыр отун биэрэбит уонна көрөллөрүн иһин харчы төлүүбүт. Ол суумата ааҕан көрдөххө 40 тыһ. солк. тэҥнэһэр, ол эбэтэр ынах төбөтүгэр бэриллэр харчы саҕа буолар эбит.Онтон сиэттэрэн «төбө» иһин бэриллэр харчы төлөнүөхтээх дии саныыбыт, сайын ынахпытын төттөрү ылан үүт туттарбакка бэйэбит ыан иһэрбитинэн.
Саҥа тэриллэр кэпэрэтиип атаҕар турарыгар элбэх үлэ, көмө үп-харчы наада. Саҥа сайылыгы тутуу уһун бириэмэни ылара саарбаҕа суох.
Биһиги баҕа санааларбыт учуокка ылыллан туолар кыахтаахтарыгар эрэлбитин сүтэрбэппит.
Модест ПЕТРОВ