Кэмпэндээйи нэһилиэгин «Сайдыы» култуура киинэ уонна Ньурба улууһун Чаппанда нэһилиэгин М.С.Семенов аатынан «Дьоҕур» норуот айымньытын дьиэтэ бииргэ үлэлииргэ сөбүлэҥ түһэристилэр. Сөбүлэҥ чэрчитинэн култуура тэрээһиннэрин бииргэ ыытыахтара, үлэ уопутун атастаһыахтара, ыкса ситимнээхтик үлэлиэхтэрэ. Бастакы икки нэһилиэк кыттыгас тэрээһиннэринэн Кэмпэндээйи нэһилиэгэр Аҕам саастаахтар күннэригэр «Көмүс күһүн» — көрсүһүү, билсиһии күнэ бэрт сэргэхтик, тэрээһиннээхтик ааста. Бу күн атыы- эргиэн дьаарбаҥката, быыстапка турда. Быыстапкаҕа Чаппанда уонна Кэмпэндээйи нэһилиэктэрин норуотун маастардарын уонна талааннаах дьонун үлэлэрэ турда.
Онтон киэһэ»Сайдыы» култуура киинигэр үбүлүөйдээх саастаах аҕам саастаахтары, уһуннук олорбут дьиэ кэргэттэри эҕэрдэлээһин буолла. Эҕэрдэ кэнсиэри ыалдьыттарбыт- элбэх күрэхтэр кыайыылаахтара, быйылгы сылга Калининград куоракка буолбут международнай күрэххэ Гран — при аатын ылбыт, 5 сылларын бэлиэтээбит ,,Эйээрэ» далбар хотуттара ылбаҕай ырыаларынан киэргэттилэр. Кэлэктиип салайааччытынан — Чаппандатааҕы Макар Семенович Семенов аатынан ,,Дьоҕур» норуот айымнньытын дьиэтин уус — уран салайааччыта , норуот ырыатын үйэтитээччи, «Бастыҥ түсчүт», «Супер бабушка — 2008 с.» — кыайыылааҕа, оһуокай этээччи Семёнова Саргылана Даниловна буолар. Салгыы итии чэйдээх, минньигэс астаах остуол тула олорон бырааһынньыктааҕы киэһэ тэрилиннэ. Барыта холбоон Чаппанда нэһилиэгиттэн 13 аҕам саастаах дьон кэлэн ыалдьыттаан, сэргэхситэн аастылар.
Мааны ыалдьыттарбытын нэһилиэкпит биллэр-көстөр сирдэригэр сырытыннардыбыт, хаартыскаҕа хатаатыбыт.
Бу күн, Саргылана Даниловна идеятынан быйылгы үлэлиир сезоҥҥа икки нэһилиэк Кэппэндээйи уонна Чаппанда бииргэ сомоҕолоһон шефтэһии дуогабарыгар илии тутуһан тарҕастыбыт. Эһиил саас икки нэһилиэк кыттыылаах улахан кэнсиэри Дьокуускай куоракка ыытарга сүбэлэстибит.
Анна Тотонова-Күн Күөрэгэйэ «Сайдыы» КК салайааччыта
