Кэмпэндээйи ыһыаҕын биир сүрүн тэрээһининэн «Байаан нарын иэйиитинэн» Бүлүү бөлөх улуустарыгар аан бастаан байаан күрэҕэ буолла. Бу күрэскэ Бүлүүттэн, Ньурбаттан, Сунтаартан баянистар кытыннылар.
Күрэс өр сылларга ырыа уонна муусука учууталынан үлэлээбит Егор Спиридонов аатын үйэтитэр сыаллаах ыытылынна. Егор Гаврильевич РСФР Үөрэҕириитин Бочуотунай грамотатын хаһаайына, Кэмпэндээйи сэлиэнньэтин бочуоттаах олохтооҕо этэ.
Манна даҕатан эттэххэ, Тымтайдаах диэн кэмпэндээйилэр ыһыахтыыр сирдэригэр кини аата иҥэрилиннэ. Ону сэргэ Егор Гаврильевичка мемориальнай дуосканы төрөппүт оҕолоро оҥорон туруордулар.
Күрэс түмүгүнэн Бүлүүттэн анаан-минээн кытта кэлбит Виктор Платонов Гран-при буолан, Егор Гаврильевич уола Иван Махаров туруорбут сүрүн бирииһин – 50000 солк. уу харчынан бириэмийэлэннэ. Оттон Тойбохойтон Клара Тихонова I үрдэл буолла. Кини эмиэ 15000 солк. харчынан наҕараадаланна. Оттон II үрдэлгэ Сунтаартан Афанасий Евсеев тахсан, 10000 солк. бэлиэтэннэ. Ньурба баяниһа Тимофей Шестаков-Түмэппий Чоххуруос III үрдэл буолла. Кини бирииһэ – 5000 солк. харчы.
Бириистэри Егор Гаврильевич кэргэнэ Олимпиада Спиридонова, эдьиийэ Тамара Спиридонова уонна Елизавета Спиридонова туруордулар.
Оттон Күндэйэттэн Александр Степанов I үктэли ылла. Кутанаттан Егор Третьяков II үктэл буолла. Кинилэр «Сайдыы» култуура-сынньалаҥ киинин үлэһиттэрэ туруорбут сыаналаах бириистэрин туттулар. Тимофей Шестаков көрөөччүлэр биһирэбиллэрин ылыан ылла.
Оттон ыһыах киэһэ өттүгэр элбэх кыттааччылаах байаанынан үҥкүү күрэһэ ыытылынна. Дьаархантан Лариса Иванова-Ырыа Дьаархан, Кэмпэндээйиттэн Юлия Фокина кыайыылаах буолан уу харчынан наҕараадаланнылар. Муома улууһуттан кэлбит ыһыах ыалдьыттара үҥкүүһүттэрэ эмиэ сөхтөрдө, кинилэр эмиэ сыаналаах бириис тутан, түһүлгэттэн илии тутуурдаах, өттүк харалаах таҕыстылар.
Дьэ, бу курдук, биир дойдулаахтара Егор Спиридонов аатынан баянистар күрэстэрэ олус сэргэхтик, үрдүк тэрээһиннээхтик ыытылынна. Тэрийээччилэр успуонсардаабыт дьонноругар истиҥ махталларын этэллэр.
Яина ВЛАСЬЕВА