Үс сыллааҕыттан киин балыыһа үлэһиттэрэ баччаларга Кэмпэндээйи үрэҕинэн тыынан устан, көй салгынынан тыынан, араас күрэхтэһиилэри тэрийэн дуоһуйа сынньанан кэлэр үгэстээхтэр. Быйыл эмиэ 25 буолан баран сынньанан кэллилэр. Бу сырыыларын ыам ыйын 25 күнүгэр бэлиэтэнэр Бүлүү өрүс күнүгэр анаатылар. Манна сылдьан «Ыраас биэрэк» диэн аахсыйаҕа кыттан, эбэҕэ түһэр үрэх кытыытынан муус үтүйэн аҕалбыт бөҕүн – маһы, оту ыраастаатылар.
Биир күннээх үрэҕинэн устууга доруобуйа харыстабылын үлэһиттэрэ салгын саатынан сыал ытыыга күрэстэстилэр. Күрэс буолан баран кыайыылаах, кыайтарыыылаах баар буолара биллэр. Ол курдук, кыраҕы харахтааҕынан — Татьяна Семенова буолла. Иккис миэстэни Дайаана Захарова ылла, оттон үһүскэ Марианна Корнилова таҕыста. Оттон саамай бэргэн ытааччынан – муҥутуур кыайыылааҕынан Анатолий Попов билиннэ. Кыайыылаахтар бу тэрээһини тэрийбит орто сүһүөх медиктэр ассоциациялара бэлэмнээбит грамоталарынан, өйдөбүнньүк бэлэхтэринэн бэлиэтэннилэр.
Оттон тыынан устуу күнүнэн «Көмүс эрдии» бочуоттаах ааты Ольга Семенова сүктэ.
Дьэ, бу курдук, доруобуйа харыстабылын үлэһиттэрэ түбүктээх, эппиэтинэстээх үлэлэриттэн быыс булан, айылҕаҕа сынньанан, үгүһү кэпсэтэн, оонньоон-көрүлээн, күүстэригэр күүс эбинэн үлэ нэдиэлэтин саҕалаатылар.
Яина ВЛАСЬЕВА