Олунньу 27 күнүгэр, дьыбар тахсыыта сарсыардаттан Сунтаардааҕы технологическай колледжка СВО-ҕа сылдьар буойун уолаттар ийэлэрин, кинилэр кэргэттэрин кытта көрсүһэ куораттан Уопсастыбаннай палаата бэрэстэбиитэлэ, саллааттар уонна мотуруостар ийэлэрин кэмитиэтин бэрэссэдээтэлэ Емельянова Мария Егоровна кэлэн атах тэпсэн олорон ирэ-хоро кэпсэттибит, санаа үллэһиннибит.
Ийэлэр барахсаттар билбэттэрэ элбэх. Мунаарар үгүс боппуруостарыгар туһааннаах хоруйдары ыллылар, туруорустулар.
Наадалаах диэбитин Мария Егоровна болҕомтоҕо ылан кичэйэн сурунна.
Ийэлэр, кэргэттэр санаа баттыга буола сылдьаллара көстөр.
Сороҕор истиэххэ ыарахан түгэннэрэ эмиэ баар буолан, дууһам уйадыйда, ол тустаахха ыарахана өйдөнөр.
Мария Егоровна Саха сирин саллаат оҕолоох Ийэлэр кэмитиэттэригэр үлэлээбитэ 26 сыл буолбут. Бу эттэххэ дөбөҥ. Бу тухары Арассыыйа элбэх байыаннай чааһыгар оҕолорбутугар ыарахан кэмнэригэр улахан сыралаах үлэни ыытар, барар-кэлэр, өссө дойдуларын санатан Ыһыах тэрийэн алаадьынан күндүлүүрэ, көрөн-истэн кэлэрэ да күндү.
Байыаннай чаастары кытта ыкса сибээстээхтик үлэлиир, улаханнык махтанар киһибит.
Бааһырбыт уолаттары кытта айаннаан тиийэн көрсүһэрэ бу 70- чалаах киһиэхэ ыарахана чуолкай.
Биһиги, ийэлэр, махталбыт муҥура суох, этэҥҥэ сырыт, Мария Егоровна!
Көрсүһүүгэ биир ийэ 3 уолум бу байыаннай дьайыыга сылдьар диэбитин соһуйа иһиттим. Бу Ивановтар дьиэ кэргэнтэн Афоня, Артём, Пётр диэн уолаттар. Уоллара Афанасий икки төгүллээн сылдьыбыт, иккис сырыытыгар икки атаҕар бааһыран дойдутугар төннүбүт.
Биир дойдулаахтара – Хадан дьоно-сэргэтэ олус иһирэх көрсүһүүнү тэрийэн, үтүө тыллары анаан, мааны астаах остуол тэрийбиттэриттэн уол долгуйа, уйадыйа үөрбүт санаатын бэйэтин дьонунуун үллэстибит.
Байыаннай дьайыыттан кэлбит Афоняны ити кэнниттэн идэҕэ уһуйар колледж кэлэктиибэ устудьуоннары кытта көрсүһүү оҥорон, буойун элбэх түгэннэри кэпсээн, сүрдээх патриоттуу тыыны сахпыт буолуон сөп. Афоня олоххо элбэҕи билэрэ-көрөрө бэйэтин тас көстүүтүгэр кытта көстөр. Кини төрөппүттэригэр маннык хорсун уолу, уолаттары иитэлээн таһаартаабытыгар махтаныаҕы баҕарыллар!
Светлана ЯНКОВА, саллаат оҕолоох Ийэлэр кэмитиэттэрин
Сунтаардааҕы салаатын 2003 с. үлэһитэ, үлэ бэтэрээнэ,
элбэх оҕолоох, СВО-ҕа
сылдьар уоллаах ийэ, эбэ.