Быйыл Сунтаардааҕы технологическай колледж 95 бүддьүөт миэстэтин арыйда. Ол курдук, оҕолору “Слесарь-наладчик контрольно-измерительных приборов и автоматики”, “Машинист дорожных и строительных машин”, “Повар-кондитер”, “Ювелир”, “Информационные системы и программирование” диэн үөрэхтэргэ ыҥыраллар.
9 кылаас кэнниттэн “Информационные системы и программирование” диэн үөрэххэ 15 миэстэ көрүлүннэ. Бу манна оҕолору толору компьютерынан хааччыллыбыт кылаастарга 3 сыл 10 ый үөрэтиэхтэрэ. Быйыл колледжка 3 саҥа аныгы моһуоннаах мастарыскыай арыллыаҕа. Ол курдук, бульдозер машиниһа, тырахтарыыс, улахан уйуктаах суоппар идэтин баһылааччыларга КАМАЗ массыына уонна бульдозер кэлэрэ күүтүллэр. Онтон экскаватор суоппардара аныгы симуляторга эрчиллэр кыахтаныахтара. Устудьуоннар уопсай дьиэнэн уонна үстэ итии аһылыгынан хааччыллыахтара.
Альбина Михайлова Сунтаардааҕы технологическай колледж абитуриент ыстаабын үлэһитэ иһитиннэрэр: “Быйыл ыстааппыт үлэтин бэс ыйын 20 күнүттэн саҕалаатыбыт уонна бэйэбит көрүүбүтүнэн алтынньы ыйга диэри уһатыахпытын сөп. Сыл аайы биһиги үөрэхпит кыһатыгар араас улуустан — Муоматтан, Анаабыртан, Эдьигээнтэн, ыаллыы сытар Ньурба, Үөһээ Бүлүүттэн элбэх оҕо кэлэн үөрэнэр. Билиҥҥи кэмҥэ олус наадалаах оробуочай идэлэригэр үөрэтэбит. Холобура, бульдозер суоппара, тырахтарыыс, повар идэлэригэр үөрэммит оҕолорбут 70% үлэ миэстэтинэн хааччыллаллар. Рейтинг түмүгүнэн устудьуоннарбытыгар харчынан бириэмийэ уонна үрдэтиллибит истипиэндьийэ көрүллэр”.
Ону таһынан, күннэтэ устудьуоннарга аналлаах араас тэрээһиннэр тиһигин быспакка ыытыллаллар. Онон көхтөөх ыччат кэккэтигэр кыттыс! Сунтаардааҕы технологическай колледж эһигини күүтэр. Сиһилии 89142591095 нүөмэринэн билсиҥ.
Мира АФАНАСЬЕВА
