Бүгүн Арассыыйаҕа Аҕа күнэ бэлиэтэнэр. Ол туһунан Арассыыйа бэрэсидьиэнэ Владимир Путин 2021 сыл алтынньы 4 күнүгэр Ыйаахха илии баттаабыта. Аҕа күнэ алтынньы ый үһүс өрөбүлүн күнүгэр бэлиэтэнэр.
Дьиэ кэргэҥҥэ аҕа оруола ураты суолталааҕын бары билэбит. Аҕа – көмүскээччи, бигэ тирэх уонна үтүө сүбэһит. Аҕа – иллээх дьиэ кэргэн тулхадыйбат тутааҕа. Кини оҕо тус көрүүлээх, сатабыллаах, араҥаччылыыр аналлаах буола улаатарыгар тус холобур буолар. Аҕа ыарахан түгэҥҥэ үтүө сүбэтинэн өйүүр, саҥаны баһылыырга, үрдүк чыпчааллары дабайарга көмөлөһөр. Өскөтүн ийэ оҕоҕо сылаас сыһыаны, үтүө майгыны-сигилини иитэр эбит буоллаҕына, аҕа хорсун санааны, киһи үтүө аатыгар, дьоһунугар ытыктабылы, дойдуга тапталы уонна бэриниилээх буолууну иҥэрэр.
Сунтаар 1 №-дээх орто оскуолатын үөрэнээччилэрэ аҕаларын бу бэлиэ күнүнэн истиҥ эҕэрдэлэрин тириэрдэллэр.
“Дьулуур” медиакиин эдэр кэрэспэдьиэннэрэ бэлэмнээбит видеоларын сэргээн көрүҥ.
«Сунтаар сонуннара» хаһыат