Атырдьах ыйыгар гражданскай уопсастыбаны сайыннарыыга СӨ Ил Дарханын Гранын кыайыылаахтара биллибиттэрэ. Сунтаар улууһуттан 25 сайаапка барбытыттан 2 бырайыак грант кыайыылаахтара буолбуттара.
Хоро нэһилиэгин «Содружество» уопсастыбаннай тэрилтэ патриоттуу иитии хайысхатыгар «Көлүөнэ ситимэ» диэн бырайыакка, оскуолабыт дириэктэрэ Мария Софронеева, логопед педагог Лариса Илларионова, нэһилиэк баһылыгын солбуйааччы, ыччат лиидэрэ Саян Иванов Саян үтүө суобастаахтык үлэлэһэн, грант ылары ситиспиттэрэ.
Бырайыак бастакы хардыыта В.П. Попов аатын сүгэр нэһилиэк искибиэрин эргэрбит бетоннай суолларын саҥа тротуарнай плиткаларынан саҥардылынна. Плиткалары Дьокуускай куораттан улууспут дьокутаата Семен Попов тиэйэн аҕалбыта, тутууга туттуллар кумаҕы «Айан суол» тэрилтэни кытта кэпсэтэн нэһилиэкпит баһылыга Валерий Ефимов тиэйтэрбитэ, виброплита диэн туттар тэрили Сунтаартан бэйэтин массыынатынан Егор Федоров Егор аҕалан улахан көмөнү оҥордулар.
Нэһилиэкпит ыччаттара Саян Иванов, Петр Попов, Мичил Иванов искибиэр эргэ бетонун көтүрэн, кумах кутан, сиэмэнтэлээн плиткалары тэлгэттилэр. Уолаттар үлэлэрин олус хаачыстыбалаахтык оҥорон,дьон биһирэбилин, махталын ыллылар.
Билигин искибиэрбит олус тубуста. Билии күнүн көрсө үөрүүлээх линейка өрө көтөҕүллүүлээхтик искибиэрбитигэр ыытылынна. Мантан инньэ салгыы, былааҥҥа көҕөрдүүгэ аналлаах улуустааҕы сэминээр-практикум уонна нэһилиэк олохтоохторо, оскуола үөрэнээччилэрэ, уһуйаан иитиллээччилэрэ кыттыылаах төрүттэрбитигэр аналлаах тэрээһин ыытыллыахтаах.
Хоробут сиригэр В.П.Попов аатынан искибиэр дьон-сэргэ кэрэхсээн сынньанар сылдьар киинэ, саҥаттан саҥа арыйыылары, үрдүктэн үрдүк,үтүөҕэ,билиигэ тардыһыыга ананнын.
Вера ИВАНОВА