Муус устар 7-8 күнүгэр СӨ Ил Дарханын иһинэн үлэлиир Инновационнай менеджменин үрдүкү оскуолата Сунтаар улууһугар үлэлиир. Ол курдук бүгүн Сунтаардааҕы технологическай колледж баазатыгар улууспут тэрилтэлэрин салайааччыларыгар, исписэлиистэригэр уонна улуус, нэһилиэк дьаһалтатын үлэһиттэригэр анаан профессиональнай дьоҕуру уонна көдьүүһү үрдэтиигэ туһуламмыт стратегическай сессия буолла.
Бу манна Ил Дархан өрөспүүбүлүкэ социальнай-экэнэмиичэскэй сайдыытыгар туһуламмыт стратегическай уураахтарын тула сэһэргэстилэр. Санатан эттэххэ, ыйаахтар дьадайыыны утары охсуһууну, уопсастыба доруобуйатын бөҕөргөтүүнү, биир кэлим үөрэхтээһини, тырааныспар, энэргиэтикэ инфраструктуратын, креативнай экэниэмикэни, олохтоох оҥорон таһаарыыны, туризмы, о.д.а. хайысхалары сайыннарыыны таарыйаллар. Бу ыйаахтарга олоҕуран муниципальнай таһымҥа үлэ бара турара бэлиэтэнэр.
Сессияны СӨ Ил Дарханын иһинэн үлэлиир Инновацияҕа менеджмент ректора Василий Миронов, Ил Дархан иһинэн үлэлиир сонун сүүрээни киллэрэр менеджмент үрдүкү оскуолатын сайыннарыыга дириэктэрэ Иннокентий Ксенофотов ыыталлар. Үөрэх дистанционнай видео куурус, лекция уонна бөлөҕүнэн ырытааһын, практическай үлэ быһыытынан барар.
Икки күннээх сессия сарсын салҕаныа, муниципальнай бырайыактары көрүөхтэрэ, сүбэ-ама биэриэхтэрэ.
Алена ИВАНОВА