Бу күннэргэ улуус оскуолаларыгар техническэй айар дьоҕур нэдиэлэтэ ыытылынна. Тэрийээччилэр — улуустааҕы үөрэҕирии салалтата, Н.М.Родионова аатынан Сунтаардааҕы оҕо дьоҕурун сайыннарар киин, Сунтаардааҕы политехническай лиссиэй.
Научнай-техническэй айар дьоҕур быыстапкатын бастакы хараҥаччыта «Мечты, меняющие мир» быыстапка-куонкурус улуус идэтийбит маастардарын, кинилэр үлэлэрин эдэр көлүөнэҕэ билиһиннэрии, маастар-конструктордар, саҥаны айааччылар, рационализатордар үлэлэрин киэҥ эйгэҕэ таһаарыы, билиһиннэрии сүрүн сыалынан-соругунан буолла. Ону сэргэ эбии үөрэхтээһин педагогтарын техническэй хайысхаҕа инновационнай бырайыактарын билиһиннэрэн, уопут тарҕатыыга анал былаһааккалары төрүттээһиҥҥэ болҕомто уурулунна.
Быыстапка кыттыылаахтарын бырайыактара – техническэй хайысха сайдыытын пропагандалааһын, сайыннарыы, көҕүлээһин, рационализатордар, биир интэриэстээх маастардар түмсэр, санаа атастаһар эйгэлэрин тэрийиигэ тирэҕирдэ.
Быыстапкаҕа Дьаархантан дьиэ кэргэн төрүт дьарыгын утумнааччылар Станислав Семенов, Нарианна Андреева тыа хаһаайыстыбатын, Күүкэйтэн Осип Андреев, Май Федотов уонна Илимнииртэн Ипатий Иванов, Сергей Максимов, Иннокентий Ощепков моделирование, ыарахан уйуктаах тиэхиньикэ, Сунтаартан эбии үөрэхтээһин педагогтара Андрей Афанасьев, Станислав Тихонов, Афанасий Яковлев, Айсен Сидоров, Варвара Иванова, Дмитрий Николаев робототехника, радиотехника, дизайнерскай разработка, машиностроение хайысхаларыгар үлэлэрэ дьон болҕомтотун тартылар. Тыа хаһаайыстыбатыгар туттуллар үлэни чэпчэтэр тиэхиньикэ арааһын, сири хорутар, таҥастыыр, бурдук ыһыытыгар туттуллар биэс араас функцияны биирдэ оҥорор комбайн, бэйэ таҥан оҥорбут «Боотур», «Урааҥхай»вездеходтар, болотоходтар, массыына көлүөһэтин уларытарга туттуллар албастары о.д.а. быыстапканы көрөөччүлэргэ билиһиннэрдилэр.
Быыстапка кыттыылааҕа Май Васильевич бэлиэтээн эппитин курдук кэнчээри ыччаттарбыт инникилэрэ — илиилэригэр. Онон оҕо толкуйдуур дьоҕурун таба тайанан, техническэй, инженернэй, аныгы технологиялары (робототехника, БПЛА, дизайнерскай айар дьоҕур, АРТ-эбийиэк) туһанар улахан сорук турар.
Айна ЯКОВЛЕВА