“Илии сылааһа” диэн өрөспүүбүлүкэтээҕи анал байыаннай дьайыыга кытта сылдьар уолаттарга таҥаһа тигии аахсыйатыгар Сунтаар улууһуттан 8 хамаанда кыттыыны ылла. Ол курдук, Куокуну, Кутана, Бүлүүчээн, Кириэстээх, Арыылаах, Бордоҥ, Кэмпэндээйи 2 хамаанда иистэнньэҥнэрэ 4 күн устата 344 кэмпилиэк таҥаһы тиктилэр. Сорохтор бэйэлэрин дьиэлэригэр иистэннилэр.Нэһилиэк баһылыктара иистэнньэҥнэригэр бары усулуобуйаны олохтоон биэрдилэр, таҥас быһар идэлээх дьон төһүү күүс буоллулар диэн тэрийээччилэр этэллэр. Бу күрэскэ кыттааччылар тигии хаачыстыбатыгар ордук болҕомтолорун ууран үлэлээтилэр. Иистэнэ үөрэммит дьон буолан улахан ыарахаттары көрсүбэтилэр. «Барыта уурбут-туппут курдук сатанан истэ» диэн күрэс кыттааччылара санааларын үллэстэллэр. Кириэстээх нэһилиэгин оскуолатын үөрэнээччилэрэ буойун уолаттарга сурук суруйан тигиллибит таҥастар сиэптэригэр уган ыыттылар. Кутана нэһилиэгин иистэнньэҥнэрэ тикпит таҥастарыгар хомус тыаһынан алгыс түһэрдилэр. Билигин таҥастар хомуйуллан, Дьокуускай куоракка дьүүллүүр сүбэ көрүүтүгэр айаннаатылар. Олортон 2 туурга улуустан биир кыайыылаах тахсыаҕа.
Мира АФАНАСЬЕВА