Сарсын, ахсынньы 19 күнүгэр Саха Өрөспүүбүлүкэтин Ил Дархана Айсен Николаев Саха Өрөспүүбүлүкэтин Судаарыстыбаннай Мунньаҕар (Ил Түмэҥҥа) анаан сэттис төгүлүн Анал этиитин оҥоруоҕа, бар дьонугар иһитиннэриэҕэ.
Анал этии ахсынньы 19 күнүгэр 11.00 чааска саҕаланыаҕа. Тута быһа эпииргэ «Саха» НИКХ, «Якутия 24», «Россия 24» ханаалларга көрүөххэ, «Тэтим» уонна «Россия» араадьыйаларга истиэххэ сөп.
Айсен Сергеевич 2018 сыллаахха бастакы Анал этиитигэр Ил Түмэҥҥэ, бырабыыталыстыбаҕа улахан соруктары туруорбута. Бастатан туран, Анал этиитигэр хас биирдии бырайыакка эппиэтинэстээх киһи баар буолуохтааҕын ыйбыта. Ол да курдук, биэс улахан бырайыакка — Өлүөнэ муостатын, искэн ыарыыны эмтиир диспансеры, сүрэх ыарыытын эмтиир диспансеры, Үрдүкү технология пааркатын, Дьокуускай куоракка социальнай эбийиэктэри тутууларга, айылҕа гааһын туһаҕа таһаарыы бырайыактарыгар эппиэттээхтэр анаммыттара.
Бу туруоруллубут соруктартан үгүстэрэ биэс сыл иһигэр олоххо киирбиттэрин бары да билэ, көрө сылдьабыт. Өлүөнэбитин туоруур муоста бастакы сыбаайата түһүүтүн өрөспүүбүлүкэ олохтоохторо бу аҕыйх ыйдааҕыта долгуйа, үөрэ истибиппит, көрбүппүт.
Ил Дархан быйылгы Туһаайыытыгар ханнык соруктарга тохтуоҕай, ону сэргэ кэлэр сылы туохха аныаҕын үгүс киһи күүтэр буолуохтаах.
Өрөспүүбүлүкэбит Ил Дархана Айсен Николаев быйылгы этиитиигэр Анал байыаннай дьайыы туһунан этии баар буолара саарбаҕа суох. Дойдуга анал байыаннай эпэрээссийэҕэ сыһыаннаах, онно кыттыбыт дьоҥҥо, кинилэр дьиэ кэргэттэригэр көмө, өйөбүл миэрэлэрэ сүрүн этиигэ киириэхтэрэ диэн сабаҕалыахха сөп. Саха сирин хас биирдии олохтооҕун олоҕун таһыма үрдүүрүгэр, уйгута улаатарыгар сүрүн болҕомто, сорук турар. Ил Дархан маны эмиэ тумнубата биллэр. Итини сэргэ, тыа хаһаайыстыбатын,бырамыысыланнаһы сайыннарыы уо.д.а. боппуруостарын тула үгүс этии оҥоһуллара буолуо…
«Сунтаар сонуннара» хаһыат