Илимниир оскуолатын 6-с кылааһын үөрэнээччитэ Васильев Уйгулаан — үөрэх ударнига. «Аптаах куорсун» литературнай куруһуок чилиэнэ, тенниһинэн уонна бадминтонунан дьарыктанар.
Уйгулаан дьиэ кэргэнин туһунан маннык суруйар:
«Биһиги улахан дьиэ кэргэммит. Үс бииргэ төрөөбүппүт. Ийэбит Матрена Васильевна, аҕабыт Константин Леонидович биһини олус таптыыллар, биһиэхэ дьоллоох оҕо сааһы бэлэхтииллэр. Онон биһиги кинилэргэ олус махталлаахпыт.
Эдьиийим Оксана Сунтаарга политехническай лиссиэйгэ 10-с кылааска үөрэнэр. Бырааппыт Кэскил уһуйаан иитиллээччитэ.
Биһиги, оҕолор, ийэлээх аҕабытыгар көмөлөһөбүт. Миигин аҕам эр киһи үлэтигэр, дьарыгар уһуйар. Иккиэн балыктыыбыт уонна сайыҥҥы өттүгэр от үлэтигэр көмөлөһөбүн. Быраатым төһө да кыра саастаах буоллар, эмиэ туһа киһитэ, оонньуурун хомуйар, ийэлээх аҕабыт үлэттэн кэлэн сынньана түһэллэригэр кини олус айдаарбат, чуумпутук олорон кинигэ көрөр, уруһуйдуур. Оттон эдьиийбит дьиэ үлэтигэр барытыгар ийэбитин кытары бииргэ сылдьар. Бэйэлэрэ арааһы кэпсэтэллэр, ийэбит иис үөрүйэхтэрин көрдөрөр, билиһиннэрэр, ас астыырга үөрэтэр. Сынньалаҥ кэммитин бары бииргэ атаарарбытын туохтааҕар да ордоробут».
«Сунтаар сонуннара» хаһыат