Ийэ баар буолан —
Илгэлээх олох тэнийэр,
Ийэ баар буолан —
Иллээх кэргэн иитиллэр.
Сунтаар 3 нүөмэрдээх оскуола иһинэн Ийэ дэкээдэтин чэрчитинэн, Арассыыйаҕа Дьиэ кэргэн, СӨ Оҕо саас сылыгар анаан «Ийэ уонна кыыс — кэрэ ситимэ» диэн күрэскэ, 5-9 кылаас кыргыттара күн күбэй ийэлэрин кытары көхтөөхтүк кытыннылар.
Күрэх үөрэнээччилэри оскуола олоҕор көхтөөхтүк кытталларын ситиһэр, дьиэ кэргэн сыаннастарын инники күөҥҥэ таһааран, ийэ уонна кыыс талааннарын киэҥ эйгэҕэ билиһиннэрэр, холобур оҥостор, ийэ уонна кыыс чугас сыһыаннарын, бииргэ үлэлээһиннэрин бөҕөргөтөр сыаллаах-соруктаах тэрилиннэ. Бу күрэскэ кыттааччыларга ситиһиини баҕаран оскуола дириэктэрэ Андрей Николаев бэйэтин эҕэрдэ тылын эттэ. Тэрээһини 10 кылаас үөрэнээччилэрэ Сандаара Семёнова уонна Афоня Чолоев сэргэхтик иилээн-салайан ыыттылар. «Пульс» диэн Надежда Чжан салайааччылаах оскуола иһинэн үлэлиир үҥкүү ансаамбыла «Эрэкэ — дьэрэкэ оҕолор», «Стюардессы» үҥкүүлэринэн бу дьоро киэһэни киэргэттилэр. Дьүүллүүр сүбэҕэ үлэлээтилэр: оскуола педагог бибилэтиэкэрэ Лидия Семёнова, дириэктэри иитэр үлэҕэ солбуйааччы Евгения Николаева, технология учуутала, оҕо дьоҕурун сайыннарар киин үлэһитэ, модельнай куруһуок салайааччыта Вера Зоммер, төрөппүт кэмитиэтиттэн Апрелина Данилова, 10 кылаас үөрэнээччитэ, оскуола бэрэсидьиэнэ Ньургун Иванов.
Кыттааччылар видеоролик, презентация, оонньоон көрдөрүү нөҥүө бэйэлэрин билиһиннэрдилэр, дьиэ кэргэн сөбүлээн астыыр бүлүүдэлэрин, хайдах астанарын рецебин кэпсээн, күннээҕи олоххо сөбүлээн кэтэр таҥастарын хааман көрдөрөн, оҕолор ийэлэрин киэргэтэн кэрэ уобарас оҥорон, кыраһыабай хартыыналары таҥалларыттан саҕалаан, түүттэн оҥоһуктартан сахалыы таҥас эгэлгэтигэр тиийэ иистэнэллэрин билиһиннэрэн , ылбаҕай ырыаларын иһитиннэрэн , көрөөччүлэр биһирэбиллэрин ыллылар.
Ити курдук 5 интэриэһинэй түһүмэххэ ситиһиилээхтик кыттан, кыайыылаах аатын ылан, добун сурук, сүрүн бириис хаһаайыннарынан буоллулар Арианна Лаптева, 9 кыл. ийэтинээн Татьяна Михайловнаны кытары. «Кэрэ уобарас ситимэ» анал ааты ыллылар Зарина Иванова, 5 кыл. ийэтинээн Альбина Климовналыын, «Талба талаан ситимэ» анал аакка тигистилэр Кюннэй Амбросьева, 7 кыл. ийэтин Александра Борисовнаны кытары. «Истиҥ иэйии ситимэ» анал ааты Нарыйаана Григорьева, 8 кыл. ийэтинээн Лилия Леонидовналыын ылыан ыллылар. Алина Алексеева, 6 кыл. кинини өйөөн кыттыбыт кылаас салайааччытынаан Марианна Петровалыын меренговый рулет астаан «Сайдам астаах ыал » анал ааты ылар чиэстэннилэр. Күрэх кыттааччылара бары да сүрдээҕин кыһаллан бэлэмнэммиттэрэ өтө көһүннэ. Кыттааччыларга кылаас төрөппүттэрин ааттарыттан өйөбүл бэлэх биэрбиттэрэ икки төгүл үөрүүлээх буолла. Түмүккэ, уопсай хаартыскаҕа түһүү ыытылынна.
Лидия Семенова, оскуола педагог-бибилэтиэкэрэ