Өрөспүүбүлүкэбит Ил Дархана Айсен Николаев СӨ Судаарыстыбаннай Мунньаҕын (Ил Түмэнин) дьокутааттарыгар туһаайан этиитигэр өрөспүүбүлүкэ инники сайдыытыгар, доруобуйа харыстабылыгар сыһыаннаах этиилэрин, ол иһигэр улуустарга саҥа балыыһалары тутан киллэрэн иһиэххэ диэн этиитин улуустааҕы киин балыыһа кылаабынай бырааһа Анатолий Назаров сэргии истибитин этэр.
— Дойдубут Бэрэсидьиэнэ Владимир Путин көҕүлээбит «Доруобуйа» национальнай бырайыак олоххо киириитигэр биһиги өрөспүүбүлүкэбит көрдөрүүтэ үчүгэй. Улуустарга балыыһа саҥа эбийиэктэрэ тутуллан үлэҕэ киирэллэр. Быйыл биһиги улууспутугар Хадаҥҥа ФАП үлэҕэ киирдэ, ону сэргэ Элгээйигэ балыыһа тутуута саҕаланна.
Өрөспүүбүлүкэбитигэр медицина тэрилтэлэрин материальнай-техническай базатын тупсарыы, кэҥэтии, каадыры олохсутууга үлэ тиһигин быспакка ыытылларын бэлиэтиэхпин баҕарабын.
Ил Дархаммыт эһиилги сылы Оҕо саас сылынан биллэрбитин биһирии иһиттим. Анал этиигэ ийэ буолууга, оҕо доруобуйатыгар ураты болҕомто ууруллуохтааҕа этилиннэ. Оҕолорбут доруобуйаларын туһугар эмчиттэр эрэ буолабкка, хас биирдии киһи турунан турууластаҕына омук быһыытынан биһиги сүтэн хаалбакка, өссө да сайда, туругура туруохпут.
«Сунтаар сонуннара» хаһыат