Кэмпэндээйи нэһилиэгин олохтоох бибилэтиэкэтигэр «БилииБиб» (Знания в библиотеке) лекторий үлэлээбитэ хаһыс да сыла. Манна араас хайысхалаах лекциялар тиһигин быспакка оскуола үөрэнээччилэригэр, улахан дьоҥҥо ыытыллаллар. Лектордарынан оскуола учууталлара, санаторийга эмтэнэ кэлбит араас атын идэлээх үлэһиттэр буолаллар.
Бу күннэргэ Ийэ күнүгэр аналлаах декада иһинэн лекторийга икки сэргэх тэрээһин буолан ааста. Бастакы күн Сунтаар улууһун төрүт остуол оонньууларын федерациятын салайааччыта, «Тобул» кулуубу төрүттээччи Мария Васильева ыалдьыттаата. Бастаан ийэлэргэ түҥ былыр улуу Кытайга үөскээбит Го оонньуутун үөрэтэ охсон, күрэх тэрийдэ. Онон Кэмпэндээйигэ ыытыллыбыт аан бастакы Го күрэҕэр кыайыылаах үрдүк аатын бибилэтиэкэ үлэһитэ Бадыана Бадыл кыыһа ылла, иккис миэстэни кулууптан Евгения Эверстова, үһүс миэстэни медпууҥҥа саҥа үлэлии кэлбит эдэр үлэһит Александра Винокурова ыланнар, сэмэй бириис тутан үөрдүлэр. Мария Васильевна атын остуол оонньууларын эмиэ билиһиннэрдэ. Бириэмэни билбэккэ да хааллыбыт. Салгыы элбэх оскуола, уһуйаан оҕолоро бэркэ сэргээн пикчурека, чубрики, өҥнөөх хабылыктар быраабылаларын үөрэтэ охсон, оонньоон, күрэхтэһэн олус астыннылар. Мария Васильевна олохтоох бибилэтиэкэҕэ Го оонньуу ымпыгын-чымпыгын үөрэтэр Арассыыйаҕа биллэр тириэньэр, учуутал, суруйааччы Алексей Кожунков кинигэтин бэлэх уунна.
Иккис күн лекторийга Сунтаар улууһун кылаабынай бырааһын клинико-экспертнэй үлэҕэ солбуйааччыта, «Арассыыйа ийэлэрэ» түмсүү кыттыылааҕа Марианна Корнилова ыалдьыттаата. Кини мустубут ийэлэргэ доруобуйа харыстабылыгар сыһыаннаах араас элбэх туһалаах сүбэни биэрдэ. Сунтаар киин балыыһатын үлэтин бэрээдэгин, бырааска уочаракка суруйтарыы, босхо эминэн туһаныы, инбэлииккэ тахсыы, өрөспүүбүлүкэ балыыһаларыгар эмтэнэ барыы, ыарыылары сэрэтии, диспансеризация, вакцинация туһунан сиһилии билиһиннэрдэ, кэпсээтэ. Түмүккэ чопчу ыйытыктарга хоруйдаата, кыһалҕалаах боппуруостары быһаарарга сөптөөх ыйыы-кэрдии биэрдэ.
Түгэнинэн туһанан Кэмпэндээйи ийэлэрин, тус бэйэм ааппыттан Мария Васильевнаҕа, Марианна Егоровнаҕа махталбытын тиэрдэбит, кэлэн иһэр ийэлэр күннэринэн эҕэрдэ бастыҥа буоллун, доруобай, дьоллоох буолуҥ, санаабыккыт сатаннын.
Татьяна МЕСТНИКОВА.