Бүгүн биһиги өрөспүүбүлүкэбит Ил Дархана Айсен Николаев Ил Түмэн, оройуон дьокутааттарыгар, улустаар баһылыктарыгар, уопсастыбаннаска туһаайан Анал этиитин оҥордо. Бу тэрээһини мин сылын ахсын көтүппэккэ тэлэбииһэринэн истэбин. Быйыл байыастарбытыгар сиэккэ өрө сылдьар буолан араадьыйанан иһиттим.
Айсен Сергеевич Анал этиитин СВО тиэмэтиттэн саҕалаата. Бырабыыталыстыбабытыгар байыаннай сулууспалаахтарга туох кыаллар бары көмөнү оҥорорго диэн сорук туруорда.
Оттон Туһаайыытын түмүгэр буоларын курдук эһиилги сыл туохха ананарын биллэрэрин чуумпуран олорон иһиттибит. «2025 год объявляю годом Защитника Родины» диэтин кытары биһиги ытыспыт тыаһа хабылла түстэ. Бу билиҥҥи кэмҥэ олус актуальнай боппуруос. Ийэ дойдуга тапталы оҕоҕо кыра сааһыттан иҥэрэн, патриоттуу санааҕа-өйгө иитэргэ бу дьаһал улахан төһүү күүс буолара саарбахтаммат. Ону сэргэ биһиги модун Арассыыйабыт кыайарын туһугар олохторун да кэрэйбэккэ байыаннай дьайыыга кытта сылдьар байыастарбытыгар, кинилэр дьиэ кэргэттэригэр улахан өйөбүллээх буолуоҕа. Аны туран эһиил, доҕоттоор, Аҕа дойду сэриитигэр Улуу Кыайыыны ситиспиппит 80 сыллаах үбүлүөйүн бэлиэтээри олоробут. Онон Ийэ дойдуну көмүскээччи сыла биллэриллибитэ саамай сөптөөх.
Светлана ВАЩЕНКО, «Харысхал» түмсүү көхтөөх чилиэнэ