Бэҕэһээ сэтинньи 23 күнүгэр, Ил Дархан дойду үрдүнэн Ийэ күнүн көрсө элбэх оҕолоох уонна өрөспүүбүлүкэ социальнай-экономическай сайдыытыгар кылааттарын киллэрбит ийэлэргэ судаарыстыбаннай наҕараадалары туттарда. Бу тэрээһиҥҥэ Сунтаартан Ольга Яковлева, Туойдаахтан Валентина Ераскумова «Ийэ Албан аата» анал бэлиэ III истиэпэнинэн наҕараадаланнылар.
Бу үөрүүлээх түгэнинэн, истиҥ эҕэрдэбитин тиэрдэн туран, Ольга Яковлевалыын сибээстэһэ сырыттыбыт.
-Бэйэҕит тускутунан кылгастык билиһиннэриэххит дуо?
—Биһиги Яковлевтар дьиэ кэргэттэрэ 7 оҕолоох ыалбыт, Сунтаарга олоробут. Саамай улахаммыт 19 сааһа, ХИФУ 2-с кууруһун устудьуона, нефтегазовайга үөрэнэр. Кырабыт 1 сааһын ааста, «Ньургуһун» оҕо сайдар киинин иитиллээччитэ.
-Оҕону иитиигэ тус санааларгыт?
—Оҕону иитиигэ бэйэ холобурунан, кыра эрдэхтэриттэн дьиэ ис-тас үлэтигэр сыһыаран, айылҕаҕа дьиэ кэргэнинэн сырытыннаран, аҕа саастаахтары ытыктыырга, төрөөбүт дойдуну таптыырга, айылҕаны харыстыырга, дьиэ кэргэммит иһигэр сылаас сыһыаны олохтуурга, бэйэ-бэйэҕэ көмөлөсүһэргэ үөрэтэбит.
— Хас оҕолонуом диэн саныыр этигиний?
—Оҕо сылдьан куруук элбэх куукулалаах оонньуур эбиппин, ыаллаах буолан оонньоотохпуна мин наар элбэх оҕолоох ийэ буолан оонньуур этим.
-Саҥа ыал буолбут эдэр дьоҥҥо, оҕо көрөн олорор ийэлэргэ туох сүбэ биэриэҥ этэй?
— Олоххо син биир үөһэ-аллараа тахсыылар, түһүүлэр бааллар, саҥа ыал буолар эдэр дьоҥҥо тапталгытын харыстааҥ, бэйэ-бэйэҕэ өйдөһүүнү-өйөһүүнү, кыраттан кыыһырсыбакка, бырастыы гынары сатыахха наада, оччоҕо ыал иллээх олохтонуо.
Ийэлэргэ билигин судаарыстыбыттан көмө, араас босуобуйа баар буолан дьиэ кэргэҥҥэ улахан өйөбүл буолар. Онтон оҕолорун көрөн олорор ийэлэргэ, бириэмэлээх буоллахтарына араас дьарык баар, кинилэр онон өҥө оҥорон эбии харчы киллэриниэхтэрин сөп.
— Ийэ быһыытынан холобур оҥостор киһи эйиэхэ ким буоларый?
— Миэхэ холобур оҥостор киһибинэн ийэм буолар. Кини муударай сүбэтэ-амата миэхэ элбэхтик, олоҕум тухары көмө буолар.
— Маннык үрдүк наҕарааданы ылар төһө долгутуулаах эбитий?
— Маннык үрдүктүк сыаналаан, Ийэ күнүн чэрчитинэн Ил Дархан бэйэтинэн туттарбыта олус долгутуулаах. Түгэнинэн туһанан, махталбын дьиэ кэргэним аатыттан Ил Дархаҥҥа Айсен Николаевка, улууспут аҕа баһылыгар Анатолий Григорьевка, улууспут социальнай боппуруоһун исписэлииһигэр Тамара Ивановаҕа муҥура суох махтанабыт. Миэхэ бүгүн олохпор хаһан да умнуллубат дьоллоох түгэнэ буолла.
Алена ИВАНОВА.