«Сунтаар улууhа (оройуона)» муниципальнай оройуон дьаһалтатын уонна оройуон дьокутааттарын Сэбиэтин ааттарыттан киһи-аймах утумун ситимниир сырдык эйгэлээх дьоммутун – кэнчээри ыччаппыт кэскилин түстээччилэри итиитик-истиҥник оскуолаҕа киириэн иннинээҕи саастаах оҕолору иитэр-үөрэтэр иитээччилэр күннэринэн эҕэрдэлиибит!
Быйыл Сунтаарбытыгар Төрөөбүт төрүт тыл сыла биллэриллэн араас эйгэнэн үлэ тэриллэр. Эһиэхэ, уһуйаан бары үлэһиттэригэр оҕо төрөөбүт төрүт тылын билэ, тутта үөрэнэригэр сүрдээх улахан эппиэтинэһи, төрөппүттэри кытта бииргэ ситимнээн, толоруохтара диэн бигэ эрэллээхпит!
Оскуола иннинээҕи үөрэхтээһин тэрилтэлэрин ытыктабыллаах салайааччылара, иитээччилэрэ! Эhигини өссө төгүл бүтүн Арассыыйатааҕы Иитээччи күнүнэн эҕэрдэлиибит! Улууспут үүнэр көлүөнэ кэнэҕэски ыччатын иитэн-такайан, олох суолугар үктэннэрэр сыаллаах, күннэтэ айымньылаах, элбэх түбүктээх үлэҕитигэр сүрэххит сылааһын, өйгүт-санааҕыт чыпчаалын биэрэн туран бэйэҕит идэҕитигэр бэриниилээхтик үлэлээн, оҕону сайыннарарга кырата суох кылааты киллэрбиккитинэн биhиги киэн туттабыт уонна сүһүөхтээх бэйэбит сүгүрүйэн туран дириҥ махталбытын тириэрдэбит. Иитэр-үөрэтэр көлүөнэ ыччаккыт үүнэ-сайда турдун диэн баҕа санаа бастыҥын, үтүө санаа үтүмэнин аныыбыт, тус олоххутугар дьолу-соргуну баҕарабыт!
Анатолий ГРИГОРЬЕВ, «Сунтаар улууһа (оройуона)» муниципальнай оройуон баһылыга
Ульяна ПОПОВА, Сунтаар улууһун дьокутааттарын Сэбиэтин бэрэссэдээтэлэ