Иһирэх көрсүһүү , истиҥ кэпсэтии буолла

Бээҕэһээ, ахсынньы 12 күнүгэр, улуустааҕы ааҕар кыһаҕа инбэлииттэр декадаларын түмүктээһин буолла. Тэрэһиҥҥэ улуус баһылыгын баһылыгын социальнай боппуруостарга уонна имиджевай бэлиитикэҕэ солбуйааччы Гаврил Еремеев, улуустааҕы социальнай управление салайааччыта Михаил Тимофеев, Дьарыктаах буолуу киинин дириэктэрэ Александр Николаев Александр кэлэннэр бэрт сэргэх иһитиннэриилэри оҥордулар, элбэх ыйытыыга хоруй биэрдилэр.

Быйыл Дьарыктаах буолуу киинигэр 14 киһи үлэ көрдөөн сайаапкаласпытыттан 8-һа үлэ булбут , 4 киһини төлөөн үөрэттэрбиттэр. Ордук тоҕо доруобуйатыгар хааччахтаах эдэр киһи эмтэнэ эрэ барар буоллаҕына бырайыаһа төлөнөрө, оттон көннөрү күүлэйдии барар буоллаҕына төлөммөтүн киһи быраабын күөмчүлээһин курдук көрөн үгүс киһи сөбүлэспэтин эттэ. Маны толкуйдуохха, быһааран сүбэлиэххэ, быыс-хайаҕас булуохха наада эбит. «Алмазэргиэнбанк» салайааччыта Эллада Николаева сыл устата элбэх ситиһиилэрдээх доруобуйаларынан хааччахтаах икки оҕоҕо көмө биэрбититтэн наһаа үөрдүбүт.

Түмсүү иһинэн араас дьарыктаахтар коллекцияларын көрүү буолла. Манна туох суоҕуй? 1971 сылтан саҕалаан мунньуллубут кэмпиэт суулара ( мэктиэтигэр оҕо сааспыт минньигэс сыта билиннэ), умнулла быһыытыйбыт аккырыыккаларбыт, духуулар, значоктар, чорооннор, алмазнай мозаика, янтарь киэргэллэр, кинигэлэр… Манна 3-с миэстэни лиитэрэнэн духууламмыт Розалия Уарова, 2-с миэстэни Уһун Күөлтэн кэмпиэт арааһын сиэбит Фекла Григорьева, 1-кы миэстэни оҕо эрдэҕиттэн Гагарин алыптаах мичээрин тиспит, аккырыыкка арааһын муспут Маргарита Спирова ылыахтарын ыллылар.

«Сахам тыла — өбүгэм тыла» диэн хоһуйуу күрэҕэр III м.  — Тамара Данилова, Уһун Күөл, II м. —  Василий Павлов, Устье, I м.  Зинаида Федотова, Сунтаар, буоллулар.

Улуус биир бөдөҥ салайааччыта Гаврил Михайлович олох бүтүөр диэри сылдьыста, хас биирдии коллекцияны иҥэн-тоҥон көрдө, сэргээтэ, атах тэпсэн олорон, итии чэйдээх остуолга олорсон кэпсэппитэ көрсүһүүнү ураты суолталаах сылаас тыыннаата. Махтал, Гаврил Михайловичка маннык сылаас сыһыаҥҥар!

Салайаачыларбытыгар Наталья Ильиничнаҕа, Светлана Петровнаҕа тымныы туман диэбэккэ сүүрэн-көтөн, булан-талан кэрэ тыллардаах туоһу суруктаргытыгар, сыаналаах бэлэхтэргитигэр улахан махтал, өссө үрдүк үрдэллэри! Саҕаланыаҕыттан бүтүөр диэри тэрийсибит улуус кинигэтин кыһатын эйэҕэс кыргыттарыгар ураты махтал!

 

 

Зинаида ФЕДОРОВА-Дьол Кыыма

Читайте дальше