Улууспутугар, сүдү суолталаах бэлиэ күн тосхойдо. Ол курдук , Сунтаардааҕы технологическай колледжка саҥа гараж-мастерской дьиэ үөрүүлээх арыллыыта буолла. Колледж үлэһиттэрэ, Минвостокразвития России көҕүлээбит граныгар ситиһиилээхтик кыттан, Дойду Аҕа баһылыга Владимир Путин сорудаҕынан «Президентская единая субсидия» программа чэрчитинэн , «Обслуживание грузовой техники», «Управление бульдозером» уонна «Управление экскаватором» диэн үс мастерскойу үлэҕэ киллэрдилэр.
Бэлиэ күн тэрээһинэ, колледж дириэктэрэ Гаврил Михайлов тыл этиитинэн саҕаланна. Үөрүүлээх быһыыга-майгыга ыраахтан-чугастан ыҥырыылаах ыалдьыттар, тэрилтэ салайааччылара, колледж бэтэрээннэрэ, үлэһиттэрэ уонна устудьуон оҕолор кыттыыны ыллылар. Гараж-мастерской арыллыытын туоһулуур аалай лиэнтэни Сунтаар улууһун баһылыгын экэниэмикэҕэ уонна стратегическай былааннааһыҥҥа солбуйааччыта Борис Васильев, Сунтаардааҕы технологическай колледж дириэктэрэ Гаврил Михайлов, Сунтаар нэһилиэгин баһылыгын солбуйааччыта Семен Николаев уонна колледж устудьуона быстылар.
Кэлбит ыалдьыттар эҕэрдэ тыллары, баҕа санаа бастыҥын анаатылар. Өр сыллар тухары үтүө суобастаахтык үлэлээбит уонна билигин ситиһиилээхтик үлэлии сылдьар үлэһиттэри, устудьуоннары чиэстээтилэр, махтал суруктарынан наҕараадалаатылар. Салҕыы аныгы кэм ирдэбилигэр эппиэттиир тэриллэри илиилэринэн тутан-хабан, көрөн-истэн экскурсиялаатылар.
Бу эбийиэк олоххо киирэригэр, төһө да харгыстар баалларын иһин, «Сунтарцеолит», «Сунтаравтодор», «Дабанстрой», Сунтаардааҕы ЖКС тэрилтэлэрэ күүс-көмө, өйөбүл буолан, үлэһиттэр, устудьуоннар күүстэринэн , кылгас кэм иһигэр тутуллан киирдэ.
Маннык гараж-мастерской үлэҕэ киирэн, инникитин биһиги устудьуоннарбыт туһалаах идэ ылан, промышленнай уонна производственнай тэрилтэлэргэ үлэҕэ киирэллэригэр төһүү күүс буолара саарбаҕа суох.
Елизавета ТИТОВА