Арай биирдэ кырачаан чыычаах Күөрэгэй Ороһуоспа иннинэ улахан харыйаны талан, уйаланан, сымыыттаабыт. Ону Саһыл обургу истэ охсон, сарсыарда аайы кэлэн маныыр буолбут. Харыйа анныгар туран маннык диэбит:
— Күөрэгэйчээн чыычаах, биир сымыытта биэр! Биэрбэт түгэҥҥэр, харыйаны суулларыам да, уйаҕын ыһыам.
Күөрэгэй куттанан сымыытын биэрээхтээбит. Аныгыскы күнүгэр Саһыл эмиэ кэлэн модьуйбут:
— Күөрэгэй, сымыытта биэр! Миэхэ төрөппүттэрим Ороһуоспаҕа ыалдьыттыы кэллилэр. Сымыыттаах миин буһаран күндүлүөм. Биэриэҥ суоҕа да, харыйаны суулларыам да, уйаҕын ыһыам!
Итинник биирдии биирдии сымыыты былдьаан, Күөрэгэй биир эрэ сымыыттаах хаалбыт.
Ол эрэн Саһыл обургу кэлбитэ эрэ баар:
— Күөрэгэй,сымыытта биэр! Миэхэ эдьиийим ыалдьыттыы кэллэ. Сымыытынан күндүлүөм этэ.
— Суох, Саһыл, аны биэрбэппин, биир эрэ сымыыттаах хаалаахтаатым — диэбит Күөрэгэй.
— Сымыыт суох диигин дуо, оччотугар бэйэҕин сиэн кэбиһиэм! – диэн куттаабыт Саһыл.
Күөрэгэй хайыай, куттанан бутэһик сымыытын биэрбит. Уонна биир да сымыыта суох хаалаахтаабыт. Күөрэгэй барахсан уйатыгар ытыы олорбут.
Ол кэмҥэ икки кыыс оҕо тыаҕа оонньуу сылдьыбыттар. Чыычаах ытыырын истэн, чугаһаан ыйыппыттар:
— Күөрэгэйчээн, тоҕо ытаатыҥ?
— Хайдах ытыам суоҕай?- диэн саҕалаабыт чыычаах. — Миигиттэн Саһыл арахпакка эрэйдээтэ. Куттуу-куттуу күн аайы кэлэн, сымыыппын барытын былдьаата. Онтон сарсын кэлэн бэйэбин сиирэ буолуо.
— Оо, Күөрэгэйчээн барахсан, ытыыргын тохтот, — диэбиттэр кыргыттар. — Саһыл обургу эйигин куттаан албыннаабыт дии. Хантан кини харыйаны суулларан, уйаҕын ыһыай. Дьэ, биһиги албынчыгы кэһэтиэхпит. Билигин ыппытын хаар анныгар кистиэхпит. Онтон Саһыл кэлэн, сымыыт көрдөөтөҕүнэ, эн маннык диэр: «Сымыытым суох, Саһыл, ол онно куурусса кистээбитим. Ону ыл».
Итинник диэн баран кыргыттар барбыттар.
Ол кэмҥэ Саһыл номнуо бу кэлэн турар эбит:
— Күөрэгэй, сымыытта биэр миэхэ! Ийэлээх балтым кэлэ сылдьаллар. Сымыыт буһаран күндүлүөм этэ.
— Оо, Саһыл, сымыытым уонна суох, — диэбит чыычаах. — Барытын эйиэхэ биэрбитим!
— Суох буоллаҕына, бэйэҕин сиэм, Күөрэгэй!
— Суох, көрдөһөбүн, сиэмэ! — диэхтээбит чыычаах. — Кууруссаны ыл. Ол хаар анныгар кистээбитим мин.
Саһыл үөрүөҕүн үөрэн, салбанан ыла-ыла, ыстанан тиийэн хаары хаһааччы буолбут. Ол турдаҕына ыт дьэ ойон тахсыбыт ээ! Уонна Саһылы эккирэтэн тиийэн быылын сахсыйбыт, түүтүн бурҕаппыт, кэһэтиэҕин кэһэппит.
Саһыл түөкүн дьэ кэһэйдэҕэ буолуо.
Маннык Күөрэгэй барахсан иҥсэлээх Саһылтан быыһаммыт, тыыннаах хаалаахтаабыт. Эһиилигэр эмиэ уйаланан, сымыыттаан, кырачаан чыычаахтарын улаатыннартаан саҥа дьылы көрсүбүт.
Арылхан КОКАРЕВ,
Сунтаар 1-кы №-дээх оскуолатын 3-с кылааһын үөрэнээччитэ
(хаартыска интэриниэт ситимиттэн)