Кэлиҥҥи кэмҥэ Сунтаар улууһугар дьон сынньалаҥын тэрийэр өҥөлөр балысханнык сайдан эрэллэр. Ордук бу көрүҥҥэ эдэр, эрчимнээх дьон ылсар. Тойбохой нэһилиэгэр “Horse Camping” сынньанар сир хаһаайыттара Корниловтар аны Сунтаарга суох киэҥ-куоҥ, саха санаабыта барыта баар, толору хааччыллыылаах суунар дьиэ тутан киллэрдилэр.
Үлэлэппиттэрэ аҕыйах кэм буолла. Ол эрэн, номнуо дьон сөбүлээн сынньанар сиригэр кубулуйда. Банньыкка сынньана эрэ буолбакка манна суунуу-тарааныы култууратын билсэҕин.
Маныаха хаһаайыттар дьон астына-дуоһуйа сынньанарын курдук бары усулуобуйаны тэрийбиттэр. Банньык диэҕи киһи тыла өҕүллүбэт.
Ол курдук, дьиэ ис бараана ойуур дьиэтигэр майгынныыр. Толоос, улахан, мастан олохтоох уустар оҥорбут миэбэллэрэ сынньанар хоһу толорон кэбиспиттэр. Биллэн турар, баанньык толору хааччыллыылаах, паарданар сирэ сибиэһэй маһынан бүрүллүбүт, итии салгын тутатына тахсар,
баанньыкка икки араас көрүҥ душ баар. Онон сөбүлээбиккинэн итии паар кэнниттэн уунан сайҕанаҕын. Сынньанар хоһугар суунар сир итии салгына мэһэйдээбэт. Суунан-тараанан баран сынньанар кэмҥэр телевизор көрүөххүн сөп. Караоке да ыллыаххын сөп. Таһырдьа тахсыбаккаҕын эрэ дьиэҕэ шашлык буһастан сииргэ анал оһох баар.
Хаһаайыттар Ян уонна Елизавета Корниловтар маннык үлэ көрүҥүн араас сирдэргэ сылдьан көрбүттэр, үөрэппиттэр. Онтон сынньалаҥы дьүөрэлии бэйэ доруобуйатын эмиэ тупсарыахха сөп диэн санааттан баанньык арыйарга санаммыттар.
Саха сирин тыйыс тымныытыгар саамай табыгастаах көрүҥүн талан оҥорбуттар. “Horse Camping” сынньанар сир хаһаайката Елизавета Корнилова:
“Билигин биһиги кэрэ аҥардарга анаан туспа программа бэлэмнээтибит. Ол курдук, айылҕа күүһүн туһанан кэрэ эйгэнэн туолан эти-сиини ыраастаныы диэн ис хоһоонноох сынньалаҥ күнүн бэйэҕитигэр бэлэхтиэххитин сөп. Манна эккитин скрабтаан, пилиннээн, сууйан-сотон биэрэбит. Эһиги сууна эрэ кэлбэккит ис куккут, туруккут ырааһыран, чэбдигирэн тахсыахтаах”.
Билигин Корниловтар сынньанар сирдэрин баанньыгар хампаанньанан, дьиэ кэргэнинэн кэлэн күннэрин атаараллар эбит. Сиһилии 89841215997 билсиэххитин сөп. Суруйтарыы тохтобула суох барар турар.
Мира АФАНАСЬЕВА