Аан дойдутааҕы Аҕам саастаахтар күннэринэн Хоро нэһилиэгэр сэргэх тэрээһин ааста. Нэһилиэк баһылыгын солбуйааччы, ыччат лидерэ Саян Иванов истиҥ иһирэх эҕэрдэтин тиэртэ уонна гитаранан ырыатын бэлэх уунна. Оскуола директора Мария Софронеева аҕам саастаах дьоҥҥо анаан туох үлэлэр, тэрээһиннэр ыытыллыахтарын билиһиннэрдэ. «Дьол кустуга» бөлөх толоруутугар «Кырдьаҕаска сүгүрүйүү», «Дьиэ кэргэн» диэн ырыалар ылланнылар. Бу күн аҕам саастаах дьоммут остуол тула олорон, урукку ырыалары караокенан ыллаатылар. Ол быыһыгар оҕолуу оонньоон ыллылар, ааспыт сыллары санаан «Обратно в СССР»диэн фотозонаҕа үөрэ-көтө хаартыскаҕа хатаннылар. Ааспыт үйэ 70-80-90 с. муодаларын көрдүлэр. Олус сэргэхсийэн, урукку ырыаларынан үҥкүүлээн эдэр саастарын санаатылар.
Ытыктабыллаах дьоммутугар үгүс сыллаах үтүө үлэҕит, солбук көлүөнэни үүннэрэргэ кыһамньылаах сыраҕыт иһин барҕа махталбытын, дириҥ ытыктабылбытын тиэрдэбит. Эhиги ыллыктаах сүбэҕит-амаҕыт, олоххо уҕараабат дьулуургут уонна нэһилиэк уопсастыбаннай олоҕор кѳхтѳѳх кыттыыгыт биhиэхэ улахан тирэх, тѳhүү күүс буолар. Махтанабыт бүгүҥҥү дьоро бырааһынньыкка ,болҕомтолорун туһаайан үөрүүнү — көтүүнү бэлэхтээбит эйэҕэс дууһалаах эбээлэрбитигэр, элэккэй майгылаах ийэлэрбитигэр, мичилийэр мичээрдээх кыргыттарбытыгар.
Вера ИВАНОВА
