Кэмпэндээйи нэһилиэгэр эдэр ыал үгүс. Олор ортолоругар олоххо актыыбынай көрүүлээх-истиилээх, элбэх оҕолоох эдэр ыал Герасимовтар бааллар. Ыал ийэтэ Лира Анатольевна Үөһээ Бүлүү Хоротуттан төрүттээх. Кэмпэндээйитээҕи орто оскуолаҕа эбии үөрэхтээһин педагога, оҕолорго үҥкүүнү үөрэтэр, театральнай куруһуогу салайар. Ыал аҕата Эдуард Гаврильевич Кэмпэндээйигэ төрөөбүтэ, улааппыта, бэтэринээринэн үлэлиир. Эдэр дьон 2007 сыллаахха Дьокуускайга устудьуоннуу сылдьан билсибиттэр. Көрсө түһээт, бэйэ-бэйэлэрин тута сөбүлүү көрбүттэр. Олоххо да иккиэн биир интэриэстээх буолан биэрбиттэр: айылҕаҕа сылдьыы , успуорт, чөл олох, ырыа, уруһуй , илиинэн оҥоһук, оттооһун. Лиралаах Эдик иккиэн элбэх оҕолоох улахан дьиэ кэргэҥҥэ төрөөн, иитиллэн тахсыбыт буоланнар, элбэх оҕолонор баҕа санаа хайа хайаларыгар да баар эбит. Кинилэр үс сыл доҕордоһон баран, 2010 сыллаахха ыал буолбуттар. 2010 сыллаахха уол оҕону күн сирин көрдөрөн Уолан диэн ааттаабыттар. Билигин эдэр ыал биэс оҕолоохтор: үс уол, икки кыыс. «Куоракка баар элбэх кыраһыабай кыыстан ордорон, миигин талан ылбытын сөҕөбүн. Билигин да ыйытабын «тоҕо» диэн. Ону Эдик миигин кытта кэпсэтэн көрөөт , «мин киһим бу эбит» таайбытым диир, — диэн Лира ис-иһиттэн сырдаан ахтар. Үөрэхтэрин бүтэрэн баран эдэр ыаллар бастаан утаа Түбэй-Дьаархаҥҥа кэлэн үлэлииллэр, онтон Эдик дойдутугар — Кэмпэндээйигэ көһөн кэлэн олохсуйаллар. Герасимовтар сахалыы куттаах ыал. Оҕолоро бары сахалыы ааттаахтар: Уолан, Мичийэ, Эрчимэн, Ньургун, Дайаана. Эдэр ийэ оҕолорун кытары өрүү дьарыктанар, сахалыы кинигэлэри элбэхтик ааҕаллар, ырыаны-хоһоону үөрэтэллэр. Аҕалара дьиэ ис-тас үлэтигэр эмдэй-сэмдэй уолаттарын өрүү илдьэ сылдьар. Герасимовтар дьиэ кэргэнинэн нэһилиэккэ, улууска ыытыллар үгүс тэрээһиннэргэ, күрэстэргэ өрүү кытталлар. Лира Анатольевна хаһаайка бэрдэ. Улахан дьиэ кэргэн түбүгүттэн ордон араас оҥоһугу оҥорор, оҕуруо анньар, иистэнэр, баайар. Ыал аҕата үлэтин тас өттүгэр сөбүлүүр дьарыга эмиэ элбэх. Маһынан да, тимиринэн да бэркэ уһанар, быһах оҥорууга маастар буолан эрэр. Биир дьарыгынан хаартыскаҕа айылҕа кэрэ көстүүлэрин түһэрии буолар. Арассыыйатааҕы хаартыска күрэҕэр тиийэ кыттан миэстэлэспит. Эдэр ыал ынах-сүөһү ииттинэн оҕолорун сибиэһэй үрүҥ аһынан, бэйэ этинэн, оҕуруот аһынан аһаталлар. Кинилэргэ үтүө сүбэһиттэрэ эбэлэрэ Александра Николаевна мэлдьи күүс-көмө буолар. Бу эдэр ыал биһиэхэ Кэмпэндээйигэ үтүө холобурга сылдьар бастыҥ ыал буолаллар.
Татьяна МЕСТНИКОВА