Быйыл улууспутугар окко былаан 34000 туонна бэриллэн турар. Хороҕор муостааҕы, сыспай сиэллээҕи иитэр чааһынай ыал да, кэпэрэтииптэр да, тэриллиилээх хаһаайыстыбалар да сүөһү аһылыгын бэлэмниир эппиэттээх кэмҥэ эрдэттэн бэлэмнэнэн, тыраахтары, кыраабылы, хотууру бэринэн сорохтор ходуһаҕа киирэн эрэллэр. Ол да буоллар, отчуттар Бөтүрүөп таҥаратын кэннэ, «абааһылар мунньахтаан» бүттэхтэринэ, маассабайдык ходуһаҕа киирээри тэринэллэр бадахтаах. Ол билигин төһө киһи ходуһаҕа сылдьарыттан көстөр.
Ол курдук от ыйын 8 күнүнээҕи туругунан 121 киһи хотуурдарын тыаһа, тиэхиньикэлэрин суола ходуһаҕа иһиллэр, көстөр. Бугуллар да кэчигирэһэн эрэллэр, рулоннаммыт оттор да төкүнүһэ сыталлар. Ордук биирдиилээн дьон тахсан эрэр курдук.
Улуустааҕы тыа хаһаайыстыбатын управлениета этэринэн, бу нэдиэлэ бастакы күнүн туругунан, окко 39 тиэхиньикэ тахсан үлэлии сылдьар, ол иһигэр Дьаархан нэһилиэгэр 5 тиэхиньикэ ходуһаҕа сылдьар, бу кэтэх хаһаайыстыбалаах дьон киэнэ. Холобур, Куокунуга кэтэх ыал 8 тыраахтара от үлэтигэр кыттыһар. Саамай көхтөөх отчуттардаах Дьаархан нэһилиэгэ. Куокунуга эмиэ сүүрбэччэ отчут баара отчуоттаммыт. Онон улууска билиҥҥитэ 44 туонна от чөкөтүллүбүт.
Тыа хаһаайыстыбаларын исписэлиистэрэ этэллэринэн, оттуур сорох ходуһалар ууга сыталлар эбит. Ууну түһэриигэ үлэ барар да, кыайан түспэтэх. Өрөспүүбүлүкэ бэчээтэ оттооһун хампаанньата саҕаламмытынан быйылгы от былаанын туолуутун билгэлээһиннэринэн, биһиги улууспутун былааны 100 бырыһыан толорботтор ахсааннарыгар киллэрбиттэр. Ону чуолкайдаһан улууспут тыатын хаһаайыстыбатын туһааннаах үлэһиттэриттэн ыйыталастым. Онуоха кинилэр ходуһа ууга сытара сүрүн биричиинэ буолуон сөп диэн этэллэр. Ол эрэн, күнү-дьылы халтай бараабакка, баар кыаҕы, күүһү ууран үлэлээтэхтэринэ, биһиги дьоммут сорудаҕы толоруохтарыгар эрэнэбит. Сүрүнэ, күн-дьыл туран биэрдин, күһүөрү сир уута түһүө да турдаҕа.
Яина ВЛАСЬЕВА