Бэҕэһээ Арассыыйа Бэрэсидьиэнэ Владимир Путин быһа эфиринэн суруналыыстар, ону сэргэ олохтоохтор ыйытыыларыгар хоруйдаата. Владимир Путин дойдубут социальнай-экономическай балаһыанньатын, дьон олоҕо тупсуутугар этиилэрин сэргии иһиттибит.
Ол курдук, холобур Сунтаар нэһилиэгин олохтооҕо Елена Саввинова кэлэр сыл тохсунньутуттан хамнас алын кээмэйэ үрдүөҕүн туһунан этиитин үөрэ иһиттэ:
-Кыра хамнастаах, ордук киин сиртэн ыраах олорор дьон ыйдааҕы хамнаспыт туохха да тиийбэт буолла. Ас-үөл, күннээҕи туттар малбыт-салбыт сыаната үрдүү турар. Онон бэрэсидьиэммит хамнас үрдээһинин туһунан этиитэ элбэх дьон сэҥээриитин ылла.
Манна даҕатан эттэхпинэ, биһиги өрөспүүбүлүкэбит Ил Дархана Айсен Николаев дьадайыыны утары үлэҕэ дьаһал таһаарбыта. Онон икки улахан салайааччыбыт этиилэрэ, дьаһаллара дьон олоҕо тупсарыгар улахан олук буолалларыгар мин олох саарбахтаабаппын.
«Сунтаар сонуннара» хаһыат