Бэҕэһээ Л.А. Попов аатынан Сунтаардааҕы киин бибилэтиэкэ ааҕар саалатыгар доруобуйа харыстабылын бэтэрээнэ Мария Семеновна Федорова — Куйаара «Халлаан хоһуун хотойдоро» диэн Саха авиацията олохтонуутугар, дойдубут киэҥ халлаанынан араас сылларга салгын көтөр аалларыгар үлэлээбит уонна билигин үлэлии сылдьар Сахабыт сирин чулуу дьонугар – лүөччүктэргэ анаабыт 3 чаастаах кинигэтин сүрэхтэниитэ бар дьон иннигэр буолан ааста.
Тэрээһини Л.А. Попов аатынан Сунтаардааҕы киин бибилэтиэкэ үлэһиттэрэ иилээн-саҕалаан ыыттылар. Манна кинигэ ааптара, «Аляска-Сибирь салгыннааҕы байыаннай трасса 80 сыла» юбилейнай мэтээл, «Байыаннай лүөччүк В. Захарова төрөөбүтэ 100 сыла», Гражданскай авиация 95 уонна 100 сылларыгар анаммыт Арассыыйа юбилейнай бэлиэлэрин хаһаайката Мария Семеновна — Куйаара, кинилиин бииргэ алтыспыт чугас дьоно уонна ыраахтан-чугастан ыҥырыылаах ыалдьыттар кыттыыны ыллылар.
Бу кинигэҕэ Саха сирин араас көлүөнэ лүөччүктэрэ оҕо саастарын баҕа санааларын толорон Аҕа дойдуларын көмүскүүргэ кыайыылаах кыттыыларын уонна кини сайдыытыгар күүрээннээх үлэлэрин туһунан кэпсэнэр. Дойду авиациятын сайдыытын историятыгар лүөччүктэр тус бэйэлэрэ киллэрбит кылааттарын, идэни талыы олох олуга буоларын көрдөрөр, итиэннэ ааҕааччы киэҥ араҥатыгар туһуланар. Кинигэ толору оҥоһуллан, силигэ ситэн, бэчээккэ тахсара манан аҕай дьыала буолбатах. Биллэн турар, манна элбэх күүс-сэниэ, сыра-сылба баранар. Ону ол диэбэккэ Мария Семеновна киириилээх-тахсыылаах буолан, туохтан да иҥнибэккэ, ылсыбытын тиһэҕэр тириэрдэр сыаллаах, элбэх дьону кытары кэпсэтии ыытан, сүрдээх улахан үлэттэн тахсыбыт диэн сыаналыахха наада. Кинигэ бастакы чааһа 2019 с., иккис чааһа 2021с.»Офсет» типографиятыгар оҥоһуллан тахсыбыта. Оттон үһүс чааһа быйыл «Дани-Алмас» ХЭТ хампаанньаҕа сахалыы уонна нууччалыы тылынан 100 ахсаанынан бэчээттэнэн таҕыста.
Бэлиэ түгэҥҥэ мустубут ыалдьыттар истиҥ-иһирэх кэпсэтиигэ кыттыһан туран, Мария Семеновнаҕа бэйэлэрин эҕэрдэлэрин эттилэр уонна сэмэй бэлэхтэрин туттардылар. Оттон кинигэ ааптара, кэлбит ыалдьыттарга махтанан туран «Халлаан хоһуун хотойдоро» кинигэтин бэлэх уунна.
Бу курдук, хаһан да сүппэт-симэлийбэт кинигэ күн сирин көрөн, үйэлэргэ элбэх киһи сэҥээриитин ылыа турдаҕа.
Елизавета ТИТОВА