«Халадаай-2024» саха төрүт таҥаһын тарҕатыыга туһуламмыт бырайыак Сунтаарга бэһис төгүлүн тэриллэр.
Буоларын курдук бырайыагы уопсастыбанньык, «Сунтаар ситимэ» түмсүү салайааччыта Антонина Кириллина көҕүлээтэ: «Бу бырайыагы мин историческай наука кандидата, СВФУ доцена, норуот маастара Светлана Ивановна Петровалыын ыытабыт. Биһиги сүрүн сорукпут бу бырайыак көмөтүнэн саха төрүт таҥаһын тарҕатыы буолар. Дьон сахалыы моһуоннаах таҥаһы күннээҕи олоҕор элбэхтик кэтэригэр баҕарабыт«, — диэн санаатын үллэһиннэ.
Бу сырыыга 18 иистэнньэҥ 29 халадаай арааһын тикпитин улахан түһүлгэҕэ хааман көрдөрдүлэр. Урукку өттүгэр кыттааччылар биир күҥҥэ илэ бырайыак көҕүлээччилэрин кытта тэҥҥэ тигэр буоллахтарына, бу сырыыга куйаар ситимин нөҥүө иистэннилэр. Кинилэргэ Светлана Петрова, Антонина Кириллина ыйан-кэрдэн, сүбэлээн-амалаан биэрдилэр. Бырайыагы куйаар ситиминэн ыытыы элбэх кэрэ аҥаар иис абылаҥар ылларбытын, сатыылларын көрдөрөр. Ыраах сытар тыалартан тиийэ кытыннылар. Бу күн кэрэ аҥаардарга фотозона, хаартыскаҕа түһэрии үлэлээтэ. Саҥа тиктибит халадаайдарын кэтэн үйэтитиннилэр. Кэлбит ыалдьыттар сахалыы астаах мааны сандалы остуолтан ас арааһын амсайдылар. Илиилэригэр сатабыллаах маастардар үлэлэрин атыылаһар быыстапка тэрилиннэ. Ону тэҥэ, Кириэстээхтэн Сыдьаайа алгыһын анаата, үрүмэлээх алаадьытынан, кымыһынан күндүлээтэ.
Иистэнньэҥнэр үлэлэрин түөрт халадаай көрүҥэр Арассыыйа, өрөспүүбүлүкэ таһымнаах маастардартан турар дьүүллүүр сүбэ сыаналаата. Түмүктэр маннык буоллулар.
Дьиэ кэргэнинэн халадаай тигиитигэр
«Муҥутуур кыайыылааҕынан» Екатерина Старостина (Бордоҥ) буолла.
1 үрдэл— Римма Сантаева (Сунтаар)
2 үрдэл— Оксана Доланова (Бордоҥ)
3 үрдэл— Александра Герасимова (Кэмпэндээйи).
Халадаай көрүҥҥэ
Муҥутуур кыайыылаах — Марианна Сидорова (Бордоҥ),
1 үрдэл — Люция Соколова (Сунтаар),
2 үрдэл — Мария Неустроева (Уһун Күөл) буоллулар.
Аныгылыы моһуоннаах халадаайга
Муҥутуур кыайыылаах — Альмира Иванова (Сунтаар),
1 үрдэл — Марина Максимова (Сунтаар),
2 үрдэл — Сардана Иванова (Бордоҥ) буоллулар.
Түмсүүнэн иистэниигэ
Муҥутуур кыайыылаах — «Мааны эдьиийдэр» (сал.Анна Андреева),
1-үрдэл — «Харысхал» (сал. Саргылана Конолобулова), Кириэстээх нэһ.,
2 үрдэл — «Талба» Лариса Данилова- (сал Семенова К.П.) буолан үөрүдүлэр-көттүлэр.
Анал социальнай харалта бирииһин Евдокия Даниловаҕа биэрдилэр. Кини Бордоҥ нэһилиэгэр соцхантараагынан бытовой цех арынан үлэлии олорор. Саха төрүт таҥаһын өйөөччүлэр элбэхтэрэ сөхтөрдө. Ол курдук, күрэс кыттыылаахтара араас элбэх бэлэҕи туттулар. Бырайыак ааптара Антонина Кириллина күрэһи өйөөбүт Сунтаар улууһун дьаһалтатыгар, Сунтаар улууһун култууратын уонна айылгытын салайааччыта С.Д. Омуковаҕа, тыа хаһаайыстыбатын салалтатыгар, аҕалар, Бордоҥ нэһилиэгин дьахталларын түмсүүлэригэр, Семенов С.И., Комин М.П., «Сунтаар ситимэ» түмсүүгэ махталын биллэрэр.
Бу кэскиллээх бырайыак элбэх кэрэ аҥаары иискэ уһуйда.
Мира АФАНАСЬЕВА